ប្រធានស្ថាប័នដែលមានភារកិច្ចរៀបចំដំណើរការបោះឆ្នោតបាននិយាយថា ប្រទេសស៊ីរី នឹងរៀបចំការបោះឆ្នោតសភានៅខែកញ្ញា ខាងមុខ។ លោក Mohammed Taha al-Ahmad ប្រធានគណៈកម្មាធិការជាន់ខ្ពស់សម្រាប់ការបោះឆ្នោតសភាប្រជាជន បានប្រាប់ទីភ្នាក់ងារសារព័ត៌មានរដ្ឋ SANA កាលពីថ្ងៃអាទិត្យថា ការបោះឆ្នោតនឹងប្រព្រឹត្តទៅនៅចន្លោះថ្ងៃទី ១៥ និងទី ២០ ខែកញ្ញា។

វានឹងក្លាយជាលើកដំបូងដែលត្រូវបានធ្វើឡើងនៅក្រោមអាជ្ញាធរថ្មីរបស់ប្រទេសបន្ទាប់ពីការដួលរលំអតីតប្រធានាធិបតី លោក Bashar al-Assad នៅក្នុងការវាយលុករបស់ក្រុមឧទ្ទាមលឿនដូចផ្លេកបន្ទោរកាលពីក្នុងខែធ្នូ។ មួយភាគបីនៃអាសនៈទាំង២១០ នឹងត្រូវបានតែងតាំងដោយប្រធានាធិបតីបណ្តោះអាសន្ន លោក Ahmed al-Sharaa ហើយនៅសល់នឹងត្រូវបានបោះឆ្នោតជ្រើសរើស។

នៅក្នុងបទសម្ភាសន៍កាលពីពេលថ្មីៗនេះជាមួយគេហទំព័រព័ត៌មាន Erem News សមាជិកម្នាក់ទៀតនៃគណៈកម្មាធិការរៀបចំការបោះឆ្នោត លោក Hassan al-Daghim បាននិយាយថា មណ្ឌលបោះឆ្នោតមួយនឹងត្រូវបានបង្កើតឡើងនៅក្នុងខេត្តនីមួយៗរបស់ប្រទេសស៊ីរី។

រដ្ឋធម្មនុញ្ញបណ្តោះអាសន្នដែលចុះហត្ថលេខាដោយ លោក al-Sharaa កាលពីខែមីនា បានអំពាវនាវឱ្យបង្កើតគណៈកម្មាធិការប្រជាជនដើម្បីបម្រើជាសភាបណ្តោះអាសន្នរហូតដល់រដ្ឋធម្មនុញ្ញអចិន្ត្រៃយ៍ត្រូវបានអនុម័ត ហើយការបោះឆ្នោតសកលត្រូវបានធ្វើឡើង ជាដំណើរការដែលអាចចំណាយពេលច្រើនឆ្នាំ។

ការប្រកាសការបោះឆ្នោតដែលនឹងខិតជិតមកដល់ ធ្វើឡើងនៅពេលដែលប្រទេសនេះមានការខ្វែងគំនិតគ្នាកាន់តែខ្លាំងនៅក្នុងទស្សនៈរបស់ខ្លួនចំពោះអាជ្ញាធរថ្មីក្នុងទីក្រុងដាម៉ាស បន្ទាប់ពីអំពើហិង្សាខាងនិកាយសាសនាបានផ្ទុះឡើងនៅក្នុងខេត្ត Suwayda ភាគខាងត្បូង កាលពីដើមខែនេះ។