ការិយាល័យនាយករដ្ឋមន្រ្តីអង់គ្លេស Downing Street បាននិយាយថា នៅថ្ងៃចន្ទ (២៨ កក្កដា) នេះ លោកនាយករដ្ឋមន្ត្រីអង់គ្លេស Keir Starmer នឹងធ្វើដំណើរទៅកាន់ដែនដីស្កុតឡែន ដើម្បីជួបជាមួយលោកប្រធានាធិបតីអាមេរិក Donald Trump នៅទីលានវាយកូនហ្គោលរបស់លោក ជាទីដែលប្រធានាធិបតីរូបនេះកំពុងស្ថិតនៅតាំងតែពីព្រឹកថ្ងៃសៅរ៍មក ដើម្បីពិភាក្សាលើបញ្ហាយ៉ាងទូលំទូលាយ រាប់ចាប់ពីសង្រ្គាមនៅអ៊ុយក្រែន ដែនដីហ្កាហ្សា ពាណិជ្ជកម្ម និងបញ្ហាជាច្រើនទៀត។

នៅថ្ងៃចន្ទនេះ មេដឹកនាំទាំងពីរត្រូវរំពឹងថានឹងពិភាក្សាអំពីវឌ្ឍនភាពលើការអនុវត្តកិច្ចព្រមព្រៀងពាណិជ្ជកម្មរវាងចក្រភពអង់គ្លេស និងអាមេរិក រួមជាមួយក្តីសង្ឃឹមសម្រាប់បទឈប់បាញ់នៅមជ្ឈិមបូព៌ា និងការដាក់សម្ពាធលើមេដឹកនាំរុស្ស៊ី លោក Vladimir Putin ដើម្បីបញ្ចប់សង្រ្គាមនៅអ៊ុយក្រែន។

លោក Starmer ត្រូវបានរំពឹងថានឹងលើកឡើងពីស្ថានភាពនៅតំបន់ហ្កាហ្សា ជាមួយលោក Trump ហើយក៏ទំនងជាស្វាគមន៍កិច្ចប្រឹងប្រែងរបស់អាមេរិក ក្នុងការនាំមកនូវបទឈប់បាញ់នៅតំបន់ហ្កាហ្សា ហើយពិភាក្សាអំពីអ្វីដែលអាចធ្វើបានបន្ថែមទៀតដើម្បីទទួលបានកិច្ចព្រមព្រៀងជាបន្ទាន់។

កិច្ចពិភាក្សាមុនៗជុំវិញផែនការឈប់បាញ់ និងការដោះលែងចំណាប់ថ្នូរនៅប្រទេសកាតា បានបញ្ឈប់នៅសប្តាហ៍នេះ បន្ទាប់ពីអាមេរិក និងអ៊ីស្រាអែល បានហៅក្រុមចរចារបស់ពួកគេទៅវិញ។ ជាមួយគ្នានេះ អ៊ីស្រាអែលកំពុងប្រឈមនឹងសម្ពាធកាន់តែខ្លាំងឡើងពីសម្ព័ន្ធមិត្ត ដោយទីភ្នាក់ងារផ្តល់ជំនួយបានព្រមានពីភាពអត់ឃ្លានទ្រង់ទ្រាយធំនៅតំបន់ប៉ាឡេស្ទីនមួយនេះ៕