ក្រុមឃ្លាំមើលនុយក្លេអ៊ែររបស់អង្គការសហប្រជាជាតិ បាននិយាយកាលពីថ្ងៃសៅរ៍ថា ការបាញ់ផ្លោង ឬការវាយប្រហារដោយយានដ្រូន នៅជិតរោងចក្រថាមពលនុយក្លេអ៊ែរ មិនត្រូវកើតឡើងទេ បន្ទាប់ពីមានការរាយការណ៍អំពីការវាយប្រហារយោធាបន្ថែមទៀត ទៅលើគោលដៅនានា នៅក្នុងទីក្រុង Enerhodar ជាកន្លែងដែលសមាជិកបុគ្គលិកភាគច្រើននៃរោងចក្រថាមពលនុយក្លេអ៊ែរ Zaporizhzhia (ZNPP) រស់នៅ។

លោក Rafael Grossi អគ្គនាយកនៃទីភ្នាក់ងារថាមពលបរមាណូអន្តរជាតិ (IAEA) បាននិយាយនៅក្នុងសេចក្តីថ្លែងការណ៍មួយថា ក្រុមការងាររបស់ទីភ្នាក់ងារ IAEA ដែលមានមូលដ្ឋាននៅ រោងចក្រថាមពលនុយក្លេអ៊ែរ Zaporizhzhia (ZNPP) ត្រូវបានគេជូនដំណឹងអំពីការវាយប្រហារ ហើយត្រូវបានគេនាំទៅកន្លែងចំនួនពីរក្នុងទីក្រុងនេះ កាលពីថ្ងៃសៅរ៍ ដើម្បីសង្កេតមើលការខូចខាតដែលបណ្តាលមកពីការបាញ់ផ្លោង និងការវាយប្រហារដោយយានដ្រូន កាលពីថ្ងៃសុក្រ រួមទាំងអគារដែលពួកគេបានឃើញកម្ទេចកម្ទី និងបង្អួចអគារបានបាក់បែក។

សេចក្តីថ្លែងការណ៍បាននិយាយថា ក្រុមការងាររបស់ IAEA មិនអាចបញ្ជាក់ភ្លាមៗពីពេលវេលាពិតប្រាកដ ឬមូលហេតុនៃការខូចខាតនោះទេ។

យោងតាមព័ត៌មានដែលផ្តល់ដោយរោងចក្របានឲ្យដឹងថា មជ្ឈមណ្ឌលបណ្តុះបណ្តាល ZNPP ដែលមានទីតាំងនៅខាងក្រៅទីតាំងនោះ ក៏ត្រូវបានគេកំណត់គោលដៅជាច្រើនដងផងដែរ ក្នុងឆ្នាំនេះ។ លើសពីនេះទៅទៀតនោះ ក្រុមការងារ IAEA ត្រូវបានបង្ហាញកាលពីសប្តាហ៍មុន ពីការបំផ្លិចបំផ្លាញដោយគ្រាប់ផ្លោង នៅកន្លែងផ្សេងទៀត ក្នុងទីក្រុង Enerhodar ដែលស្ថិតនៅចម្ងាយប្រហែល ៥ គីឡូម៉ែត្រ ពីរោងចក្រថាមពលនុយក្លេអ៊ែរ Zaporizhzhia (ZNPP)។