ភ្នំពេញ៖ ក្រៅពីការស្វាគមន៍ចំពោះលោកជំទាវ អាម៉ានដា មៀលលីង អនុរដ្ឋមន្រ្ដីការបរទេសនៃចក្រភពអង់គ្លេ ស ទទួលបន្ទុកកិច្ចការអាស៊ី ដែលបានមកប្រទេសកម្ពុជា ឯកឧត្ដម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ក៏បានលើកឡើងពីកិច្ចពិភាក្សាជាលក្ខណៈ ទ្វេភាគីជាមួយអនុរដ្ឋមន្ត្រីការបរទេស នៃចក្រភពអង់គ្លេសផងដែរ។ នេះបើតាមការផ្សព្វផ្សាយនៅក្នុង ហ្វេសប៊ុកផ្ទាល់របស់ឯកឧត្ដម ប្រាក់ សុខុន នៅថ្ងៃទី១១ ខែមករា ឆ្នាំ២០២២។

ប្រភពដដែលបន្តថា ដោយផ្អែកលើកិច្ចពិភាក្សាទ្វេភាគីយ៉ាងផុសផុលនៅព្រឹកនេះ កម្ពុជា និងចក្រភពអង់គ្លេសមានទស្សនៈ និងចក្ខុវិស័យស្រដៀងគ្នាច្រើនសម្រាប់ការអភិវឌ្ឍ។ យើងបានលើកឡើងពីការប្រយុទ្ធប្រឆាំងនឹងជំងឺរាតត្បាត, ការចាប់យកឱកាសដើម្បីការស្តារឡើងវិញឱ្យកាន់តែប្រសើរបញ្ហាមីយ៉ាន់ម៉ា និងការការពារសិទ្ធិមនុស្ស។ល។

ហ្វេសប៊ុកឯកឧត្ដម ប្រាក់ សុខុន ដដែលបន្ថែមថា ខ្ញុំបានឆ្លៀតឱកាសនេះថ្លែងអំណរគុណដល់រាជរដ្ឋាភិបាល និងប្រជាជននៃចក្រភពអង់គ្លេសដែលបានបង្ហាញទឹកចិត្តដ៏ថ្លៃថ្លា ចំពោះកម្ពុជាតាមរយៈជំនួយផ្សេងៗ ជាពិសេសការបរិច្ចាគវ៉ាក់សាំង។ អាស៊ានត្រៀមខ្លួនរួចជាស្រេច ដើម្បីបង្កើនភាពជិតស្និទ្ធជាមួ យចក្រភពអង់គ្លេស ខណៈដែលទើបបានក្លាយជាដៃគូសន្ទនាថ្មីទី១១ របស់អាស៊ានកាលពីឆ្នាំមុន៕​ដោយ៖ គង់ ឌិន