ទាហានប៉ារ៉ាមួយក្រុម និងសម្ព័ន្ធមិត្តរបស់ខ្លួន នៅក្នុងប្រទេសស៊ូដង់ បាននិយាយថា ពួកគេបានបង្កើត   រដ្ឋាភិបាលស្រមោលមួយ នៅក្នុងតំបន់ដែលស្ថិត នៅក្រោមការគ្រប់គ្រងរបស់ក្រុមនេះ ដែលភាគច្រើនមានទីតាំងនៅតំបន់ភាគខាងលិចនៃទីក្រុង Darfur ជាកន្លែងដែលមានការចោទប្រកាន់ពីបទឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ កំពុងត្រូវបានស៊ើបអង្កេត។

ការសម្រេចនេះ ទំនងជាធ្វើឲ្យវិបត្តិនៅក្នុងប្រទេសស៊ូដង់ កាន់តែធ្ងន់ធ្ងរឡើង ដែលធ្លាក់ចូលទៅក្នុងភាពវឹកវរ នៅពេលដែលភាពតានតឹងរវាងយោធារបស់ប្រទេសនេះ និងកងកម្លាំងយោធាប៉ារ៉ាគាំទ្ររហ័ស ឬ RSF បានឈានដល់ការប្រយុទ្ធគ្នា ក្នុងខែមេសា ឆ្នាំ ២០២៣ នៅក្នុងរដ្ឋធានីខាទុំ (Khartoum) និងកន្លែងផ្សេងទៀត នៅក្នុងប្រទេស។

សម្ព័ន្ធ Tasis ដែលដឹកនាំដោយកងកម្លាំង RSF បានតែងតាំងលោក ឧត្តមសេនីយ៍ Mohamed Hamdan Dagalo ដែលជាមេបញ្ជាការនៃក្រុមទាហាប៉ារ៉ា ជាប្រធានក្រុមប្រឹក្សាអធិបតេយ្យភាព ក្នុងរដ្ឋបាលថ្មី។ ក្រុមប្រឹក្សាដែលមានសមាជិក ១៥រូប មានតួនាទីជាប្រមុខរដ្ឋ។

កងកម្លាំង RSF បានកើតចេញពីកងជីវពល Janjaweed ដ៏ល្បីល្បាញ ដែលបានប្រមូលផ្តុំកាលពីពីរទសវត្សរ៍មុន ដោយអតីតប្រធានាធិបតី Omar Bashir ប្រឆាំងនឹងប្រជាជនដែលកំណត់ថា ជាជនជាតិអាហ្វ្រិកកណ្តាលឬខាងកើត នៅតំបន់ Darfur ។ ក្រុមជីវពល Janjaweed ត្រូវបានចោទប្រកាន់ពីបទសម្លាប់រង្គាល ការចាប់រំលោភ និងអំពើឃោរឃៅផ្សេងៗ។