ប្រធានសភាអាមេរិក លោក Mike Johnson កាលពីថ្ងៃអាទិត្យ (២៧ កក្កដា) បានហៅរូបភាពទុក្ខវេទនារបស់ពលរដ្ឋអត់ឃ្លាននៅតំបន់ហ្កាហ្សាស្រ្ទីប ថា "គួរឱ្យអាណិតណាស់" ប៉ុន្តែបាននិយាយការពារសម្ព័ន្ធមិត្តអ៊ីស្រាអែលរបស់ខ្លួនថា ក្រុមប៉ាឡេស្ទីនហាម៉ាស គឺជាអ្នកលួចជំនួយស្បៀងអាហារសម្រាប់ជនស៊ីវិល ទោះបីជាយោធាអ៊ីស្រាអែល ថារកមិនឃើញភស្តុតាងក៏ដោយ។

លោក Johnson បានប្រាប់ទូរទស្សន៍ NBC ថា "រូបភាពទុក្ខវេទនាគួរឱ្យបារម្ភ និងសោកស្ដាយណាស់ គ្រប់គ្នាចង់បានសន្តិភាពនៅក្នុងតំបន់នោះ" បន្ទាប់ពីអ្នកធ្វើបទសម្ភាសន៍បានបង្ហាញរូបភាពកុមារហ្កាហ្សា ដែលស្រេកឃ្លាន និងបានចោទសួរការសម្រេចចិត្តរបស់អ៊ីស្រាអែល ក្នុងការផ្អាកប្រតិបត្តិការយោធា ស្របពេលមានការតវ៉ាជាអន្តរជាតិជុំវិញវិបត្តិអត់ឃ្លាន។

លោក Johnson និយាយការពារសម្ព័ន្ធមិត្តទីក្រុងវ៉ាស៊ីនតោនថា “នេះជារឿងសំខាន់ដែលត្រូវកត់សម្គាល់ថា៖ ចាប់តាំងពីសង្រ្គាមចាប់ផ្តើមមក អ៊ីស្រាអែលបានផ្តល់អាហារពេញរថយន្តជាង ៩៤.០០០គ្រឿង ដែលគ្រប់គ្រាន់សម្រាប់ចិញ្ចឹមមនុស្ស ២លាននាក់សម្រាប់ពេល ២ឆ្នាំឱ្យហ្កាហ្សា ប៉ុន្តែក្រុមហាម៉ាស បានលួចស្បៀងអាហារក្នុងចំនួនដ៏ច្រើនលើសលប់"។

ប្រធានសភារូបនេះបន្តទៀតថា "ក្នុងឆ្នាំ២០២៤ ក្រុមហាម៉ាស ចំណេញជាង ៥០០លានដុល្លារ ក្នុងជំនួយស្បៀងអាហារដែលត្រូវលួចនោះ"។ ផ្ទុយពីការលើកឡើងនេះ ប្រព័ន្ធផ្សព្វផ្សាយអ៊ីស្រាអែលបានរាយការណ៍កាលពីថ្ងៃសៅរ៍ថា មន្ត្រីយោធាជាន់ខ្ពស់អ៊ីស្រាអែលបានទទួលស្គាល់ថា ពុំមានភស្តុតាងណាមួយដែលថាក្រុមហាម៉ាស់លួចជំនួយមនុស្សធម៌ជាប្រព័ន្ធ ដែលផ្តល់ដោយអង្គការសហប្រជាជាតិ អំឡុងពេលសង្រ្គាមនៅលើតំបន់ហ្កាហ្សានោះទេ៕