សារព័ត៌មាន Financial Times (FT) នៅថ្ងៃចន្ទ (ទី២៨ ខែកក្កដា) នេះ បានរាយការណ៍ថា សហរដ្ឋអាមេរិកបានផ្អាកការទប់ស្កាត់លើការនាំចេញបច្ចេកវិទ្យាទៅកាន់ប្រទេសចិន ដើម្បីបញ្ចៀសការរំខានដល់កិច្ចពិភាក្សាពាណិជ្ជកម្មជាមួយទីក្រុងប៉េកាំង និងគាំទ្រដល់កិច្ចប្រឹងប្រែងរបស់ប្រធានាធិបតីអាមេរិក លោក Donald Trump ដើម្បីមានកិច្ចប្រជុំជាមួយប្រធានាធិបតីចិន លោក Xi Jinping នៅឆ្នាំ២០២៥ នេះ។

ដោយដកស្រង់សម្តីមន្ត្រីបច្ចុប្បន្ន និងអតីត សារព័ត៌មាន FT បានឲ្យដឹងថា ការិយាល័យឧស្សាហកម្ម និងសន្តិសុខនៃក្រសួងពាណិជ្ជកម្មសហរដ្ឋអាមេរិក ដែលគ្រប់គ្រងការត្រួតពិនិត្យការនាំចេញ ត្រូវបានប្រាប់នៅក្នុងប៉ុន្មានខែថ្មីៗនេះ ឲ្យជៀសវាងនូវចំណាត់ការតឹងរ៉ឹងលើប្រទេសចិន។

ពាក់ព័ន្ធនឹងសេចក្ដីរាយការណ៍ សារព័ត៌មាន Reuters មិនអាចផ្ទៀងផ្ទាត់របាយការណ៍នេះភ្លាមៗបានឡើយ។ សេតវិមាន និងក្រសួងក៏មិនបានឆ្លើយតបនោះដែរទៅនឹងសំណើរបស់សារព័ត៌មាន Reuters សម្រាប់ការសុំការធ្វើអត្ថាធិប្បាយនៅខាងក្រៅម៉ោងធ្វើការ។

គួរដឹងថា មន្ត្រីសេដ្ឋកិច្ចជាន់ខ្ពស់របស់សហរដ្ឋអាមេរិក និងចិន គ្រោងនឹងចាប់ផ្ដើមឡើងវិញនូវកិច្ចពិភាក្សា នៅទីក្រុង Stockholm ប្រទេសស៊ុយអែត នាថ្ងៃទី២៨ ខែកក្កដានេះ ដើម្បីដោះស្រាយជម្លោះសេដ្ឋកិច្ចដ៏យូរអង្វែង ដែលជាដើមហេតុចម្បងនៃសង្គ្រាមពាណិជ្ជកម្ម រវាងប្រទេសដែលមានសេដ្ឋកិច្ចធំជាងគេបំផុតទាំង២។

ក្រុមហ៊ុនបច្ចេកវិទ្យាយក្ស Nvidia បានឲ្យដឹងនៅក្នុងខែកក្កដានេះថា ខ្លួននឹងបន្តលក់បន្ទះឈីបក្រាហ្វិក H20 របស់ខ្លួន ទៅប្រទេសចិន ជាកែប្រែនូវការទប់ស្កាត់ការនាំចេញដែលរដ្ឋបាលរបស់លោក Trump បានដាក់កាលពីខែមេសា ដើម្បីទប់ស្កាត់បន្ទះឈីបបញ្ញាសិប្បនិម្មិត (AI) កម្រិតខ្ពស់ កុំឲ្យចិនប្រើប្រាស់ ដោយសារមានកង្វល់សន្តិសុខជាតិ៕