រដ្ឋមន្ត្រីរាប់សិបនាក់នឹងជួបជុំគ្នា នៅអង្គការសហប្រជាជាតិ (UN) នាថ្ងៃចន្ទ (ទី២៨ ខែកក្កដា) សម្រាប់សន្និសីទដែលត្រូវបានពន្យារពេល ដើម្បីពីភាក្សាឆ្ពោះទៅរកដំណោះស្រាយរដ្ឋ២ រវាងអ៊ីស្រាអែល និងប៉ាឡេស្ទីន ប៉ុន្តែសហរដ្ឋអាមេរិក និងអ៊ីស្រាអែល កំពុងធ្វើពហិការមិនចូលរួមព្រឹត្តិការណ៍នេះ។

មហាសន្និបាត UN ដែលមានសមាជិកចំនួន ១៩៣នាក់ បានសម្រេចកាលពីខែកញ្ញាឆ្នាំមុនថា សន្និសីទបែបនេះ នឹងត្រូវធ្វើឡើងនៅឆ្នាំ២០២៥។ ដោយត្រូវបានដឹកនាំដោយប្រទេសបារាំង និងអារ៉ាប៊ីសាអ៊ូឌីត សន្និសីទនេះ ត្រូវបានពន្យារពេលក្នុងខែមិថុនា បន្ទាប់ពីអ៊ីស្រាអែលបានវាយប្រហារអ៊ីរ៉ង់។

សន្និសីទនេះមានគោលបំណងដាក់ចេញនូវគោលការណ៍ សម្រាប់ផែនទីបង្ហាញផ្លូវ ដែលនាំប៉ាឡេស្ទីនឆ្ពោះទៅកាន់ភាពជារដ្ឋមួយ ស្របពេលជាមួយគ្នាធានាសន្តិសុខដល់អ៊ីស្រាអែល។ រដ្ឋមន្ត្រីការបរទេសបារាំងលោក Jean-Noel Barrot បានប្រាប់សារព័ត៌មាន La Tribune Dimanche នៅក្នុងបទសម្ភាសន៍មួយដែលបានចេញផ្សាយកាលពីថ្ងៃអាទិត្យថា លោកក៏នឹងប្រើប្រាស់សន្និសីទក្នុងសប្តាហ៍នេះ ដើម្បីជំរុញប្រទេសផ្សេងទៀតឲ្យចូលរួមជាមួយប្រទេសបារាំងក្នុងការទទួលស្គាល់រដ្ឋប៉ាឡេស្ទីន។ លោកប្រធានាធិបតី Emmanuel Macron បាននិយាយកាលពីសប្តាហ៍មុនថា ប្រទេសបារាំងមានបំណងទទួលស្គាល់រដ្ឋប៉ាឡេស្ទីន នៅក្នុងខែកញ្ញាឆ្នាំមុន អំឡុងកិច្ចប្រជុំប្រចាំឆ្នាំរបស់មេដឹកនាំពិភពលោក នៅឯមហាសន្និបាត UN។

សន្និសីទនេះកើតមានឡើងនៅពេលដែលអ៊ីស្រាអែលបន្តសង្រ្គាមរយៈពេល ២២ខែរបស់ខ្លួន នៅតំបន់ហ្កាហ្សា។ អ្នកនាំពាក្យក្រសួងការបរទេសអាមេរិក បានឲ្យដឹងថា ទីក្រុងវ៉ាស៊ីនតោននឹងមិនចូលរួមសន្និសីទនៅ UN នេះទេ ដោយពិពណ៌នាថា វាជា «អំណោយដល់ក្រុមហាម៉ាសដែលបន្តបដិសេធសំណើបទឈប់បាញ់ទទួលយកដោយអ៊ីស្រាអែល ពោលគឺជាកិច្ចព្រមព្រៀងដែលនឹងនាំទៅដល់ការដោះលែងចំណាប់ថ្នូរ និងនាំមកនូវភាពស្ងប់សុខ នៅតំបន់ហ្កហ្សា។ លោក Jonathan Harounoff អ្នកនាំពាក្យអន្តរជាតិនៅបេសកកម្ម UN របស់អ៊ីស្រាអែល បាននិយាយថា អ៊ីស្រាអែលក៏មិនចូលរួមក្នុងសន្និសីទនេះដែរ ពោលគឺជាការជួបជុំ «ដែលមិនបានដោះស្រាយជាបន្ទាន់នូវបញ្ហានៃការថ្កោលទោសលើក្រុមហាម៉ាស និងការដោះលែងចំណាប់ថ្នូរនៅសល់ទាំងអស់»៕