បន្ទាប់ពីធ្វើឲ្យលោក Donald Trump សប្បាយចិត្តជាមួយនឹងការសន្យាបង្កើនការចំណាយលើវិស័យការពារជាតិ នៅក្នុងកិច្ចប្រជុំកំពូលរបស់អង្គការណាតូ ឥឡូវនេះ អឺរ៉ុបកំពុងត្រៀមប្រឈមជាមួយនឹងការសម្រេចចិត្តដ៏សំខាន់មួយពីប្រធានាធិបតីអាមេរិក ស្តីពីអនាគតនៃកងកម្លាំងអាមេរិក នៅទ្វីបនេះ។

បច្ចុប្បន្ន ទីក្រុងវ៉ាស៊ីនតោនកំពុងធ្វើការពិនិត្យឡើងវិញ ជុំវិញការដាក់ពង្រាយកងកម្លាំងយោធារបស់ខ្លួននៅទូទាំងពិភពលោក ដែលគ្រោងនឹងដាក់បង្ហាញនៅប៉ុន្មានខែខាងមុខនេះ ហើយការរំពឹងទុក គឺថា វានឹងនាំទៅរកការដកកម្លាំង នៅអឺរ៉ុប។

ការរំពឹងទុកនោះ កំពុងធ្វើឲ្យមានការភ័យខ្លាចដល់សម្ព័ន្ធមិត្តរបស់សហរដ្ឋអាមេរិក ជាពិសេសនៅពេលដែលការភ័យខ្លាចបានរីករាលដាល ដែលថា រុស្ស៊ីអាចសម្លឹងដល់ការវាយលុកប្រទេសសមាជិករបស់អង្គការណាតូណាមួយផ្សេងទៀត ក្នុងរយៈពេលប៉ុន្មានឆ្នាំខាងមុខ ប្រសិនបើសង្រ្គាមនៅអ៊ុយក្រែនចប់ទៅ។

តែទោះជាយ៉ាងណាក្ដី សម្ព័ន្ធភាពកំពុងទទួលបានភាពវិជ្ជមាន ជុំវិញសុច្ឆន្ទៈថ្មីរបស់លោក Trump បន្ទាប់ពីមានកិច្ចប្រជុំកំពូល កាលពីខែមិថុនា នៅទីក្រុងឡាអេ ប្រទេសហូឡង់ ហើយមន្ត្រីរបស់លោកកំពុងបញ្ចេញសំឡេងគាំទ្រ ដែលថា អឺរ៉ុបនឹងមិនត្រូវបានទុកចោលឲ្យស្ថិតក្នុងភាពច្របូកច្របល់នោះឡើយ។

មន្ទីរបញ្ចកោណ ឲ្យដឹងថា មានបុគ្គលិកយោធាអាមេរិកជិត ៨៥.០០០នាក់ នៅអឺរ៉ុប ដែលជាចំនួនឡើងចុះពីចន្លោះ ៧៥.០០០ ទៅ ១០៥.០០០នាក់ គិតចាប់តាំងពីមានការលុកលុយរបស់រុស្ស៊ីឆ្នាំ២០២២ លើអ៊ុយក្រែន៕