ភ្នំពេញ៖ រាជរដ្ឋាភិបាលផ្ទេរថវិកាទៅរដ្ឋបាលថ្នាក់ក្រោមជាតិ ក្នុងឆ្នាំ ២០២២ នេះ មានទំហំទឹកប្រាក់សរុបជាង ១ ពាន់លានដុល្លារ ក្នុងនោះ សម្រាប់ឃុំ-សង្កាត់ ២០៧ លានដុល្លា, ក្រុង-ស្រុករួមបញ្ចូលវិស័យអប់រំ ១៧២ លានដុល្លារ និងសម្រាប់រាជធានី-ខេត្ត បញ្ចូលទាំងវិស័យ សុខាភិបាល មានចំនួន ៨៦៧ លានដុល្លា ដើម្បីធ្វើឲ្យឆ្លើយតបទៅនឹងតម្រូវការរបស់ប្រជាពលរដ្ឋ នៅតាមមូលដ្ឋាននីមួយៗ។
ឯកឧត្ដម ចាន់ សុធា អនុរដ្ឋលេខាធិការក្រសួងមហាផ្ទៃ និងជាអនុប្រធានលេខាធិការដ្ឋាន គណៈកម្មាធិការជាតិសម្រាប់ការ អភិវឌ្ឍ តាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) លើកឡើងនៅក្នុងសន្និសីទសារព័ត៌មានស្តីពីវឌ្ឍនភាពនៃដំណើរការអនុវត្តកម្មវិធីអភិវឌ្ឍន៍ តាមបែបប្រជាធិបតេយ្យសម្រាប់ថ្នាក់ក្រោមជាតិ នៅថ្ងៃទី១១ ខែមករា ឆ្នាំ២០២២ នេះថា ទាក់ទងកម្មវិធី វិមជ្ឈការហិរញ្ញវត្ថុ បានបង្កើតនូវប្រព័ន្ធគ្រប់គ្រងហិរញ្ញវត្ថុរបស់រដ្ឋបាលថ្នាក់ក្រោមជាតិ តាមគោលការណ៍វិមជ្ឈការហិរញ្ញវត្ថុដូចជា៖ ប្រព័ន្ធគ្រប់គ្រង ហិរញ្ញវត្ថុរដ្ឋបាលឃុំ-សង្កាត់ និងប្រព័ន្ធគ្រប់គ្រងហិរញ្ញវត្ថុរដ្ឋបាលក្រុង-ស្រុក ដើម្បីគ្រប់គ្រង ចាត់ចែង និងប្រើប្រាស់ធនធានហិរញ្ញវត្ថុ ប្រកបដោយប្រសិទ្ធភាព តម្លាភាព និងគណនេយ្យភាព។
ឯកឧត្តម បន្តថា ប្រព័ន្ធគ្រប់គ្រងហិរញ្ញវត្ថុ ក្នុងឆ្នាំ ២០២២ នេះ រាជរដ្ឋាភិបាលផ្ទេរថវិការទៅរដ្ឋបាលថ្នាក់ក្រោមជាតិ សរុប មានចំនួន ១,០៤៣ លានដុល្លារអាមេរិក ក្នុងនោះ សម្រាប់ឃុំ-សង្កាត់ មានថវិកា ២០៧ លានដុល្លា ខណៈនៅឆ្នាំ២០០២ ឃុំ-សង្កាត់ នីមួយៗមានថវិកាជាមធ្យម ៤,៥០០ ដុល្លារ ក្នុងមួយឆ្នាំ។ ចំណែកក្រុង-ស្រុក មានថវិកាចំនួន ១៣៩ លានដុល្លា រួមជាមួយថវិកាផ្ទេរ ក្នុងវិស័យអប់រំ ប្រមាណជាង ៣៣ លានដុល្លា ដោយនៅក្នុងឆ្នាំ២០១៣ ក្រុង-ស្រុកនីមួយៗ មានថវិកាជាមធ្យមជាង ៧៩ ម៉ឺនដុល្លារ ក្នុងមួយឆ្នាំ។ ដោយឡែកសម្រាប់រាជធានី-ខេត្ត មានថវិកាចំនួន ៦៩៧លានដុល្លារ រួមបញ្ចូលទាំងថវិកាផ្ទេរក្នុងវិស័យសុខាភិបាល ប្រមាណជិត ១៧០លានដុល្លារអាមេរិកផងដែរ។
សូមបញ្ជាក់ថា៖ ប្រព័ន្ធផ្ទេរធនធានហិរញ្ញវត្ថុ ទៅឱ្យរដ្ឋបាលថ្នាក់ក្រោមជាតិ ត្រូវបានបង្កើតឡើងរួមមាន ប្រព័ន្ធផ្ទេរធនធានហិរញ្ញវត្ថុ គ្មានភ្ជាប់លក្ខខណ្ឌដូចជា មូលនិធិឃុំ សង្កាត់, មូលនិធិក្រុង ស្រុក និងប្រព័ន្ធផ្ទេរធនធានហិរញ្ញវត្ថុមានភ្ជាប់លក្ខខណ្ឌដូចជា ប្រព័ន្ធ ផ្ទេរមូលនិធិវិនិយោគសម្រាប់រដ្ឋបាលថ្នាក់ក្រោមជាតិ និងប្រព័ន្ធផ្ទេរធនធានហិរញ្ញវត្ថុ សម្រាប់អនុវត្តមុខងារដែលបានផ្ទេរ ព្រមទាំង ប្រព័ន្ធចែករំលែកចំណូលសារពើពន្ធរវាងរដ្ឋបាលថ្នាក់ក្រោមជាតិ និងរដ្ឋបាលថ្នាក់ក្រោមជាតិ។
ចំណែកក្របខ័ណ្ឌនៃការធ្វើវិមជ្ឈការ ហិរញ្ញវត្ថុ និងភាពជោគជ័យនៃកំណែទម្រង់ការគ្រប់គ្រងហិរញ្ញវត្ថុសាធារណៈ រាជរដ្ឋាភិបាលបានបង្កើនការផ្ទេរថវិការដ្ឋជារៀងរាល់ឆ្នាំ ទៅឱ្យរដ្ឋបាលថ្នាក់ក្រោមជាតិ រហូតមកទល់ឆ្នាំ២០២១នេះ ថវិកានេះមានចំនួនសរុបប្រមាណជាង ៤ ពាន់លានដុល្លារអាមេរិក សម្រាប់ការគ្រប់គ្រង ការចាត់ចែង និងការប្រើប្រាស់ក្រោមឆន្ទានុសិទ្ធិរបស់ខ្លួន ដើម្បីឆ្លើយតបទៅនឹងតម្រូវការរបស់ប្រជាពលរដ្ឋនៅ តាមមូលដ្ឋាននីមួយៗ៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
