ក្រសួងការបរទេសកូរ៉េខាងត្បូង បានឲ្យដឹងថា អ្នកការទូតជាន់ខ្ពស់នៃប្រទេសកូរ៉េខាងត្បូង និងចិន បានព្រមព្រៀងគ្នា នៅថ្ងៃចន្ទ (ទី២៨ ខែកក្កដា) នេះ ក្នុងការធ្វើការរួមគ្នា ដើម្បីធ្វើឲ្យកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នាពេលខាងមុខ ក្លាយជា «ចំណុចរបត់ថ្មី» នៅក្នុងទំនាក់ទំនងទ្វេភាគី ខណៈដែលឥស្សរជនទាំង២ បានជជែកគ្នាតាមទូរសព្ទជាលើកដំបូង។

ក្រសួងការបរទេសបានលើកឡើងនៅក្នុងសេចក្តីប្រកាសមួយថា រដ្ឋមន្ត្រីការបរទេស លោក Cho Hyun និងរដ្ឋមន្ត្រីការបរទេសចិន លោក Wang Yi បានសម្តែងទស្សនៈនេះ ក្នុងអំឡុងពេលសន្ទនាតាមទូរសព្ទរយៈពេល ៤៥នាទី ដោយបញ្ជាក់ឡើងវិញនូវការប្តេជ្ញាចិត្តរបស់ពួកលោក ក្នុងការជំរុញភាពជាដៃគូសហប្រតិបត្តិការយុទ្ធសាស្ត្រទ្វេភាគី ក្នុងលក្ខណៈ «មានស្ថិរភាព និងចាស់ទុំ»។

ក្រសួងបានបញ្ជាក់ថា៖ «ពួកលោកទាំង២ បានយល់ព្រមធ្វើការជាមួយគ្នា ដើម្បីធានាថា កិច្ចប្រជុំកំពូល APEC នាពេលខាងមុខ នៅទីក្រុង Gyeongju ដើរតួជាចំណុចរបត់ថ្មី ក្នុងទំនាក់ទំនងទ្វេភាគី និងដើម្បីផ្តល់នូវលទ្ធផលជាក់ស្តែង តាមរយៈកិច្ចសហប្រតិបត្តិការជាក់ស្ដែងដែលអាចឲ្យប្រជាជននៃប្រទេសទាំង២ មើលឃើញប្រចក្ស»។

ជាមួយគ្នានេះ ឥស្សរជនទាំង២ ក៏បានយល់ព្រមបន្តរក្សាសន្ទុះវិជ្ជមាន ក្នុងទំនាក់ទំនងទ្វេភាគី តាមរយៈការផ្លាស់ប្តូរកម្រិតខ្ពស់។

កិច្ចប្រជុំកំពូល APEC គ្រោងនឹងប្រព្រឹត្តិទៅនៅទីក្រុងភាគអាគ្នេយ៍នៃប្រទេសកូរ៉េខាងត្បូង ចាប់ពីថ្ងៃទី៣១ ខែតុលា ដល់ថ្ងៃទី១ ខែវិច្ឆិកា។ ប្រធានាធិបតីចិន លោក Xi Jinping ត្រូវបានគេរំពឹងយ៉ាងទូលំទូលាយថា នឹងចូលរួមកិច្ចប្រជុំពហុភាគីនេះ។ ប្រទេសចិន គឺជាម្ចាស់ផ្ទះសម្រាប់កិច្ចប្រជុំកំពូល APEC នៅឆ្នាំក្រោយ៕