មន្ត្រីជាន់ខ្ពស់បារាំងបង្ហាញអារម្មណ៍ខឹងសម្បា ចំពោះកិច្ចព្រមព្រៀងពាណិជ្ជកម្ម ដែលបានកើតឡើង កាលពីថ្ងៃអាទិត្យ (ទី២៧ ខែកក្កដា) រវាងសហរដ្ឋអាមេរិក និងសហភាពអឺរ៉ុប (EU)។

នាយករដ្ឋមន្ត្រីបារាំង លោក François Bayrou នៅថ្ងៃចន្ទ (ទី២៨ ខែកក្កដា) នេះ បានចូលរួមនាំមុខ ក្នុងការបង្ហាញការរិះគន់យ៉ាងខ្លាំងក្លា ចំពោះកិច្ចព្រមព្រៀងនេះ ជាមួយអ្នកនយោបាយបារាំងគ្រប់មជ្ឈដ្ឋាន ដែលភាគច្រើន បានជំរុញឲ្យទីក្រុងប្រ៊ុចសែល អនុវត្តការគំរាមកំហែងសងសឹក ដើម្បីទទួលបានលក្ខខណ្ឌល្អប្រសើរជាងនេះ។

លោក Bayrou បានសរសេរនៅលើបណ្ដាញសង្គម X ថា៖ «វាជាថ្ងៃដ៏ខ្មៅងងឹតមួយ នៅពេលដែលសម្ព័ន្ធភាពនៃប្រជាជនសេរី ដែលរួបរួមគ្នាអះអាងពីតម្លៃរបស់ពួកគេ និងការពារផលប្រយោជន៍របស់ពួកគេ បង្ហាញពីការព្រមចុះញ៉ម»។

ឥស្សរជនធំៗពីរដ្ឋាភិបាលរបស់លោក Bayrou បានអះអាងថា វាគឺជាការល្អ ដែលអាចទទួលបាននូវវិធានការស្ថិរភាព ដោយការកំណត់អាត្រាពន្ធ ១៥ភាគរយ លើការនាំចូលភាគច្រើនរបស់ EU ដើម្បីការពារការគំរាមកំហែងនៃកម្រិត ៣០ភាគរយដែលនឹងចូលជាធរមាននៅថ្ងៃទី១ ខែសីហា តែប្រធានគណៈកម្មការអឺរ៉ុប លោកស្រី Ursula von der Leyen និងក្រុមចរចារបស់លោកស្រី បានបរាជ័យក្នុងការប្រើប្រាស់ឲ្យបានសមរម្យនូវទីផ្សារដ៏ធំតែមួយរបស់ EU ហើយព្រមចុះញ៉ម ចំពោះប្រធានាធិបតីអាមេរិក លោក Donald Trump។

រដ្ឋមន្ត្រីពាណិជ្ជកម្ម លោក Laurent Saint-Martin បានប្រាប់វិទ្យុ FranceInter នៅថ្ងៃចន្ទនេះថា លោកមិនចង់ឲ្យទីក្រុងប៉ារីស «ដោះស្រាយជាមួយនឹងអ្វីដែលបានកើតឡើងកាលពីម្សិលមិញនោះទេ ព្រោះវានឹងជាការទទួលយកថា អឺរ៉ុបមិនមែនជាមហាអំណាចសេដ្ឋកិច្ចនោះឡើយ»៕