យោធានិយាយថា កងកម្លាំងសន្តិសុខឥណ្ឌា បានសម្លាប់ក្រុមឧទ្ទាមសង្ស័យ ៣នាក់ នៅតំបន់កាស្មៀ គ្រប់គ្រងដោយឥណ្ឌា អំឡុងការប្រយុទ្ធគ្នានៅឧទ្យានជាតិ ។

ឧបទ្ទេវហេតុនេះ បានកើតឡើងនៅថ្ងៃចន្ទនេះ ក្នុងតំបន់ភ្នំ Dachigam មានចម្ងាយប្រហែល ៣០គ.មភាគខាងកើតទីក្រុង Srinagar ។

កងទ័ពឥណ្ឌា និយាយនៅក្នុងសេចថ្លែងការណ៍បង្ហោះនៅលើបណ្តាញព័ត៌មានសង្គមថា ភេរវជន ៣នាក់ ត្រូវបានសម្លាប់នៅក្នុងការប្រយុទ្ធគ្នាដ៏តានតឹង ខណៈប្រតិបត្តិការនៅតែបន្ត ។

តំបន់កាស្មៀដែលភាគច្រើនគឺជាជនមូស្លីម ត្រូវបានបែងចែករវាងឥណ្ឌា និងប៉ាគីស្ថាន ចាប់តាំងពីការទទួលបានឯករាជ្យរបស់ពួកគេពីការគ្រប់គ្រងរបស់អង់គ្លេស កាលពីឆ្នាំ ១៩៤៧ ហើយប្រទេសមហាអំណាចនុយក្លេអ៊ែរទាំង ២ បានប្រយុទ្ធគ្នាក្នុងសង្រ្គាម ៣លើករួចមកហើយ ជុំវិញការគ្រប់គ្រងតំបន់កាស្មៀ ។

ចាប់តាំងពីឆ្នាំ ១៩៨៩មក ក្រុមឧទ្ទាមកាស្មៀ បានប្រយុទ្ធគ្នា ប្រឆាំងការគ្រប់គ្រងរបស់ឥណ្ឌា ទាមទារឯករាជ្យ ឬការបញ្ចូលតំបន់ជាមួយប៉ាគីស្ថាន ។ ឥណ្ឌា បានចោទប្រកាន់ប៉ាគីស្ថានថាបានគាំទ្រក្រុមបះបោរ ប៉ុន្តែទីក្រុង Islamabad និយាយថា ខ្លួនមានតែផ្តល់ការគាំទ្រផ្នែកការទូតដល់ការតស៊ូរបស់តំបន់កាស្មៀ សម្រាប់បូរណភាពទឹកដីខ្លួនឯង ៕