ភ្នំពេញ៖ វាគឺជាព័ត៌មានគួរឱ្យសោកសង្រេងបំផុត នៅពេលទទួលដំណឹងថា វីរកណ្ដុរ Magawa បានទទួលមរណភាពកាលពីចុងសប្ដាហ៍កន្លងមកនេះ។ នេះបើតាមការចុះផ្សាយនៅក្នុងគេហទំព័រ APOPO។

ប្រភពដដែលបន្តថា Magawa មានសុខភាពល្អជាធម្មតា ដោយចំណាយពេលភាគច្រើនកាលពីសប្តាហ៍មុនរត់លេងដោយរីករាយជាធម្មតា។ ប៉ុន្តែស្រាប់តែនៅចុងសប្តាហ៍នេះ Magawa បានចាប់ផ្តើមប្រែ ប្រួលសុខភាពគួរឱ្យកត់សម្គាល់ និងដេកច្រើន ហើយក៏មិនសូវស៊ីចំណីផងដែរ។ ស្ថានភាពបែបនេះ បានបន្តរហូតដល់ថ្ងៃដែល Magawa បានទទួលមរណភាព។ Magawa ទើបបានប្រារព្ធពិធីគម្រប់ខួប ៨ ឆ្នាំកាលពីខែវិច្ឆិកាកន្លងមកថ្មីៗនេះ។

បុគ្គលិកទាំងអស់របស់ APOPO មានអារម្មណ៍សោកស្ដាយជាពន់ពេកចំពោះការបាត់បង់ជីវិតរបស់ Magawa ហើយយើងក៏ដឹងគុណមិនភ្លេចចំពោះការងារដ៏អស្ចារ្យដែល Magawa បានបំពេញកន្លងមក ផងដែរ។ ក្នុងអំឡុងពេលបំពេញការងារ Magawa បានរកឃើញគ្រាប់មីនជាង ១០០ គ្រាប់ និងគ្រឿង ផ្ទុះផ្សេងៗជាច្រើនទៀត។ ការរកឃើញនេះ បានធ្វើឱ្យ Magawa ក្លាយជាវីរកណ្ដុរ(Hero RAT)ដ៏ជោគ ជ័យបំផុតរបស់ APOPO។ ការបំពេញការងាររបស់ Magawa បានក្លាយជាចំណែកមួយ ដែលជួយឱ្យ ពលរដ្ឋកម្ពុជាបានរស់នៅ ធ្វើការ និងលេងកម្សាន្តដោយមិនបារម្ភពីគ្រឿងផ្ទុះ។ នៅអំឡុងខែកញ្ញា ឆ្នាំ ២០២០, Magawa ទទួលបានមេដាយមាស PDSA ដែលជាពានរង្វាន់ខ្ពស់បំផុតសម្រាប់សត្វ ដែលមានសមត្ថភាពខ្ពស់។ Magawa បានចូលនិវត្តន៍កាលពីឆ្នាំមុន និងបានក្លាយជាសត្វចិញ្ចឹមចាប់ពីពេលនោះមក។

គួរកត់សម្គាល់ផងដែរថា រាល់ការរកឃើញសំណល់គ្រឿងផ្ទុះរបស់ Magawa បានជួយកាត់បន្ថយភាព ភ័យខ្លាចពីគ្រោះថ្នាក់ នៃការរងរបួស ឬស្លាប់ដល់ពលរដ្ឋកម្ពុជា ពីសំណល់គ្រឿងផ្ទុះ។ Magawa គឺជាកណ្ដុរយក្សអាហ្រ្វិក(Cricetomys ansorgei) ដែលបានចាប់កំណើតនៅប្រទេសតង់ហ្សានី នៃ Sokoine University of Agriculture ហៅកាត់(SUA) កាលពីខែវិច្ឆិកា ឆ្នាំ២០១៣។ ចាប់តាំងពីឆ្នាំ២០០០ មក APOPO បានបង្កើតទីស្នាក់ការកណ្តាលបណ្តុះបណ្តាល និងបង្កាត់ពូជនៅ SUA ជាកន្លែងដែលកណ្ដុរទាំងអស់ ដែលបានកើត និង​ទទួល​ការ​បណ្តុះបណ្តាលនៅទីនោះ។ ទីនោះក៏ជាកន្លែងនៃផ្នែកនវានុវត្តន៍របស់ APOPO សម្រាប់ការស្រាវជ្រាវ និងបង្កើតកម្មវិធីប្រកបដោយភាពច្នៃប្រឌិដ្ឋ និងបច្ចេកទេសកម្រិ តខ្ពស់ដែលប្រើក្នុងប្រតិបត្តិការដែលមានស្រាប់។ ទីនោះក៏ជាកន្លែងដែល Magawa បានរៀនពីវិធីសាស្ត្រស្វែងរកគ្រឿងផ្ទុះដោយការហិតក្លិនដ៏អស្ចារ្យរបស់វា។ Magawa បានផ្លាស់មកខេត្តសៀមរាបក្នុងប្រទេសកម្ពុជាកាលពីឆ្នាំ២០១៦ និងជាកន្លែងដែលវាបានចាប់ផ្តើមអាជីពហិតរកសំណល់គ្រឿងផ្ទុះ។

ក្រោយពេលទទួលមរណភាពទៅ Magawa បានបន្សល់ទុកនូវមរតកដ៏យូរអង្វែងនៃជីវិតរបស់គេ ក្នុងឋានៈជាកណ្ដុររកមីន និងសំណល់គ្រឿងផ្ទុះនៅកម្ពុជា៕​ ដោយ៖ គង់ ឌិន