រដ្ឋអាជ្ញាបារាំង នៅថ្ងៃចន្ទ (ទី២៨ ខែកក្កដា) នេះ បានឲ្យដឹងថា ពួកគេបានស្នើសុំដីកាចាប់ខ្លួនថ្មី ប្រឆាំងនឹងអតីតប្រធានាធិបតីស៊ីរី លោក Bashar al-Assad ជុំវិញការវាយប្រហារដោយសារធាតុគីមីបណ្ដាលឲ្យមានមនុស្សស្លាប់ច្រើនបំផុត កាលពីឆ្នាំ២០១៣ បន្ទាប់ពីការស្នើលើកមុន ត្រូវបានលុបចោល។

ពេលនេះ វាអាស្រ័យលើចៅក្រមស៊ើបអង្កេត ដើម្បីសម្រេចថា តើត្រូវចេញដីកាថ្មីដែរ ឬអត់។ ចាប់តាំងពីឆ្នាំ២០២១ មក ក្រុមអ្នកស៊ើបអង្កេតបារាំង បាននិងកំពុងពិនិត្យមើលការវាយប្រហារដោយឧស្ម័នសារីន (SARIN) របស់រដ្ឋាភិបាលស៊ីរី ដែលសង្ស័យថា បានសម្លាប់មនុស្សជាង ១.០០០នាក់។ នេះបើយោងតាមការស៊ើបអង្កេតរបស់សហរដ្ឋអាមេរិក កាលពីថ្ងៃទី ៤-៥ ខែសីហា ឆ្នាំ២០១៣ នៅតំបន់ Adra និង Douma នៅខាងក្រៅទីក្រុងដាម៉ាស។

តុលាការ Cassation ដែលជាតុលាការកំពូលរបស់ប្រទេសបារាំង កាលពីថ្ងៃសុក្រចុងសប្ដាហ៍កន្លងមក បានសម្រេចថា មិនមានករណីអាចដកអភ័យឯកសិទ្ធិប្រធានាធិបតីបានឡើយ សូម្បីតែ សម្រាប់ការចោទប្រកាន់ពីបទឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ ដោយលុបចោលដីការបស់បារាំងប្រឆាំងនឹងលោក al-Assad ដែលបានចេញនៅឆ្នាំ២០២៣ នៅពេលដែលលោកនៅតែជាមេដឹកនាំដដែល។

តែស្ថាប័នបានបន្ថែមថា ខណៈដែលលោក al-Assad ដែលត្រូវបានទម្លាក់ចេញពីអំណាច កាលពីខែធ្នូឆ្នាំមុន មិនមែនជាប្រធានាធិបតីទៀតទេ ដីកាថ្មីអាចត្រូវបានចេញ ហើយការស៊ើបអង្កេតរបស់បារាំងអាចបន្តធ្វើ។

ការិយាល័យរដ្ឋអាជ្ញាប្រឆាំងភេរវកម្ម (PNAT) បានឲ្យដឹងកាលពីថ្ងៃសុក្រថា ពួកគេបានស្នើសុំ «ការចេញ និងផ្សព្វផ្សាយជាអន្តរជាតិនៃដីកាចាប់ខ្លួនលោក Bashar al-Assad ជុំវិញការសង្ស័យពាក់ព័ន្ធនឹងឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្គ្រាម» នៅក្នុងករណីវាយប្រហារដោយប្រើប្រាស់គីមី៕