​បាល់ទាត់៖ ក្លិប​ភ្នំពេញ​ក្រោ​នបាន​ចុះ​អនុស្សារណៈ​យោគយល់​គ្នា ​(MOU) ជាមួយ​ក្លិប​ហាត់ប្រាណ Premium Fitness ដែលជា​ដៃគូ​សហការ​ថ្មី ដើម្បី​រួមចំណែក​ក្នុងការ​ហ្វឹកហាត់​កាយសម្បទាសម្រាប់​ត្រៀម​រដូវ​កាល​ថ្មីឆ្នាំ​២០២២ ខាងមុខ។ ពិធី​ចុះ MOU នេះបានធ្វើ​ឡើង​នៅ​កីឡដ្ឋាន Smart RSN កាល​ព​ថ្ងៃទី​១១ ខែមករា ឆ្នាំ​២០២២ ដោយមាន​ការចូលរួម​ពី​លោក កែវ សុខ​ង៉​ន អ្នកចាត់ការ​ទូទៅ​ក្រុម​ភ្នំពេញ​ក្រោ​ន រួមទាំង​លោក​ឧកញ៉ា ស្រី ចាន់ថន និង​លោកជំទាវ រិ​ទ្ធ ដា​រ៉ា​វីន អគ្គនាយិកា​ក្លិប​ហាត់ប្រាណ​នេះ​ផងដែរ។​

​លោក កែវ សុខ​ង៉​ន បាន​បញ្ជាក់ថា ក្នុង​រដូវ​កាល​ថ្មី​នេះក្លិប​របស់ខ្លួនមានការ​ប្រកួតប្រជែង​កាន់តែខ្លាំង ដូច្នេះ​លោក​បានបង្ហាញ​នូវ​សុទិដ្ឋិនិយមចំពោះ​ដៃគូ​សហការ​ថ្មី​របស់ខ្លួន នឹង​ក្លាយជា​ផ្នែក​មួយ​ដ៏​សំខាន់ក្នុងសម័យ​បាល់ទាត់​ទំនើប ដើម្បី​ជំរុញ​ការហ្វឹកហាត់​កាយសម្បទា​របស់​កូនក្រុម​ឲ្យ​កាន់តែ​សើរ សម្រាប់​ត្រៀម​ការប្រកួតប្រជែង​ទាំង​ថ្នាក់ជាតិ និង​អន្ដរជាតិ។​ ​ទន្ទឹម​ជាមួយគ្នាលោក​ឧកញ៉ា ស្រី ចាន់ថន តំណាង​ក្លិប​ហាត់ប្រាណ Premium Fitness ក៏បាន​សម្ដែង​នូវ​ការសប្បាយ​ចិត្តដែល​បានរួម​ចំណែក​គាំទ្រ និង​អភិវឌ្ឍន៍​វិស័យ​កីឡា​ជាតិដោយ​ផ្ដើមចេញពី​កិច្ចសហការ​ជាមួយ​ក្លិប​ភ្នំពេញ​ក្រោ​ន​។ លោក​រំពឹងថា តាមរយៈ​កិច្ចសហការ​នេះនឹងធ្វើ​ឲ្យ​កីឡាករ​-​កីឡាការិនី​កាន់តែ​មាន​កាយ​សម្បទាន​រឹងមាំ ហើយ​ជំរុញ​ការប្រកួតប្រជែង​កាន់តែ​មាន​ប្រសិទ្ធភាព និង​ជក់ចិត្ត​ថែមទៀត។​

​គួរ​ដឹងថា ភ្នំពេញ​ក្រោ​នបានបញ្ចប់​បេសកកម្ម​ឆ្នាំ​ចាស់ ជាមួយ​តំណែង​ជើងឯក​លី​គ​កំពូល​កម្ពុជាឆ្នាំ​២០២១ ហើយ​ក្នុង​រដូវ​កាល​ថ្មី​ខាងមុខ ក្រៅពី​ត្រូវបំពេញ​ភារកិច្ច​ការពា​រ​តំណែង​ជើងឯក ក៏ដូចជា​ការប្រកួតប្រជែង​ពានរង្វាន់​សម្ដេច​តេ​ជោ ហ៊ុន សែន ក្រុម​រហស្សនាម​សិង្ហ​ក្រហម​នេះក៏ត្រូវ​តំណាង​កម្ពុជាចូលរួម​ប្រកួត​ពានរង្វាន់ AFC Cup 2022 វគ្គ​ចែក​ពូ​ល​ផងដែរ៕

​អត្ថបទ៖ លី ឈុន​ឡា