ប្រធានាធិបតីសហរដ្ឋអាមេរិកលោក Donald Trump បានកំណត់ឱសានវាទថ្មីកាលពីថ្ងៃចន្ទ ២៨ កក្កដា នៃ១០ ឬ១២ ថ្ងៃសម្រាប់ប្រទេសរុស្ស៊ីដើម្បីធ្វើវឌ្ឍនភាពឆ្ពោះទៅរកការបញ្ចប់សង្រ្គាមនៅអ៊ុយក្រែន ពុំនោះត្រូវប្រឈមនឹងផលវិបាកដោយបញ្ជាក់ពីការខកចិត្តជាមួយប្រធានាធិបតីរុស្ស៊ីលោក Vladimir Putin ជុំវិញជម្លោះដែលមានអាយុកាល៣ឆ្នាំកន្លះ។      

លោក Trump បានគំរាមដាក់ទណ្ឌកម្មទាំងលើរុស្ស៊ី ទាំងលើប្រទេសទិញការនាំចេញរបស់ខ្លួន លុះត្រាតែមានការរីកចម្រើន។ ថ្ងៃផុតកំណត់ថ្មីបង្ហាញថា ប្រធានាធិបតីអាមេរិក ត្រៀមខ្លួនដើម្បីឆ្ពោះទៅមុខលើការគំរាមកំហែងទាំងនោះ បន្ទាប់ពីស្ទាក់ស្ទើរក្នុងការធ្វើដូច្នេះ។

ថ្លែងនៅក្នុងទឹកដីស្កុតលែន របស់អង់គ្លេស ជាទីដែលលោកកំពុងជួបប្រជុំជាមួយក្រុមមេដឹកនាំអឺរ៉ុប លោក Trump បាននិយាយថា លោកមានការខកចិត្តចំពោះលោក Putin ហើយបានកាត់បន្ថយរយៈពេល ៥០ថ្ងៃដែលលោកបានកំណត់សម្រាប់ការបញ្ចប់សង្រ្គាមអ៊ុយក្រែនកាលពីដើមខែនេះ។

លោក Trump បានប្រាប់អ្នកព័ត៌មានក្នុងអំឡុងពេលកិច្ចប្រជុំជាមួយនាយករដ្ឋមន្រ្តីអង់គ្លេសលោក Keir Starmer ថា លោកនឹងកំណត់ពេលវេលាថ្មីប្រហែល ១០ឬ១២ថ្ងៃចាប់ពីថ្ងៃនេះទៅ។មិនមានហេតុផលក្នុងការរង់ចាំទេ ដោយសារមិនទាន់មើលឃើញមានការរីកចម្រើនណាមួយត្រូវបានបង្កើតឡើងនៅឡើយទេរហូតដល់ពេលនេះ។  

ពុំមានការអត្ថាធិប្បាយភ្លាមៗពីវិមានក្រឹមឡាំងទេ។

ក្នុងការប្រកាសនៅលើបណ្ដាញសង្គម X អតីតប្រធានាធិបតីរុស្ស៊ីលោក Dmitry Medvedev ដែលជាសម្ព័ន្ធមិត្តជិតស្និទ្ធរបស់លោក Putin បាននិយាយថា លោកTrump កំពុងប្រឡែងលេងល្បែងនៃឱសានវាទ ដែលអាចនាំឱ្យមានសង្រ្គាមពាក់ព័ន្ធនឹងសហរដ្ឋអាមេរិក៕