កូរ៉េខាងជើង៖ សារព័ត៌មានរដ្ឋបាននិយាយនៅថ្ងៃពុធនេះថា លោក Kim Jong Un មេដឹកនាំកូរ៉េខាងជើងបានអំពាវនាវឲ្យពង្រឹងកងកម្លាំងយោធាជាយុទ្ធសាស្ត្ររបស់ប្រទេសនេះ ខណៈលោកត្រួតពិនិត្យការបាញ់សាកល្បងមីស៊ីលល្បឿនលឿនជាងសំឡេង ជាការចូលរួមការបាញ់មីស៊ីលជាលើកដំបូងក្នុងរយៈពេលជិត ២ឆ្នាំ។
កាលពីថ្ងៃអង្គារ ក្រុមអាជ្ញាធរនៅក្នុងប្រទេសកូរ៉េខាងត្បូង និងជប៉ុនបានតាមដានការបាញ់អាវុធដែលមិនស្គាល់ប្រភេទ ដែលនាំឲ្យមានការថ្កោលទោសពីប្រទេសជាច្រើននៅក្នុងពិភពលោក និងបានជំរុញឲ្យអគ្គលេខាធិការអង្គការសហប្រជាជាតិបង្ហាញក្ដីបារម្ភយ៉ាងខ្លាំង។ ការសាកល្បងលើកទី២ នៃមីស៊ីលល្បឿនលឿងជាងសំឡេងកាលពីថ្ងៃអង្គារ ទី១១ ខែមករាសប្ដាហ៍នេះ ដែលជាការបាញ់ក្នុងពេលមិនដល់មួយសប្ដាហ៍បានស្ដែងឲ្យឃើញពីការប្ដេជ្ញាក្នុងឱកាសឆ្នាំថ្មីរបស់លោក Kim ក្នុងការពង្រឹង និងបង្ហាញសាច់ដុំខាងយោធាបន្ថែមទៀតជាមួយនឹងបច្ចេកវិទ្យាទំនើប ស្របពេលការចរចាជាមួយកូរ៉េខាងត្បូង និងសហរដ្ឋអាមេរិកជាប់គាំង។
កាលពីថ្ងៃព្រហស្បតិ៍ ទី៦ ខែមករាសប្ដាហ៍មុន កូរ៉េខាងជើងបានប្រកាសថា ខ្លួនបានបាញ់សាកល្បង "មីស៊ីលល្បឿនលឿនជាងសំឡេង" ហើយបាននិយាយថា មីស៊ីលនោះបានរត់ក្នុងចម្ងាយ ៧០០គីឡូម៉ែត្រដើម្បីវាយប្រហារគោលដៅរបស់ខ្លួន។ ទីភ្នាក់ងារសារព័ត៌មាន KCNA របស់កូរ៉េខាងជើងបានរាយការណ៍ថា បន្ទាប់ពីត្រួតពិនិត្យការសាកល្បង លោក Kim បានជំរុញក្រុមអ្នកវិទ្យាសាស្រយោធាឲ្យបង្កើនកិច្ចខិតខំប្រឹងប្រែងបន្ថែមទៀតដើម្បីពង្រឹងសាច់ដុំខាងយោធា ជាយុទ្ធសាស្ត្រជាលំដាប់របស់ប្រទេសនេះទាំងគុណភាព ទាំងបរិមាណ រួមទាំងការធ្វើទំនើបកម្មកងទ័ពបន្ថែមទៀតផងដែរ។ នេះគឺជាការបាញ់លើកដំបូងចាប់តាំងពីឆ្នាំ២០២០ ដែលលោក Kim បានចូលរួមការបាញ់សាកល្បងមីស៊ីលជាផ្លូវការ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
