​បាល់ទាត់៖ ​ក្របខណ្ឌ​លី​គ​កំពូល​អង់គ្លេស Premier League បានឱ្យដឹងថា​ ស្ថានភាព​ឆ្លង​មេរោគ Covid-19 មានការ​ថយចុះពីរ​សប្តាហ៍​ជាប់ៗ​គ្នា​។ ​​រាប់​គិត​ពេញ​មួយ​សប្តាហ៍​ត្រឹម​ថ្ងៃទី៩ ខែមករា​កន្លងទៅ Premier League រកឃើញ​ករណី​ឆ្លង​ថ្មី ៧២ករណី​ក្រោយពី​ការយក​សំណាក​ចំនួន ១២៩៧៣ លើ​កីឡាករ និង​បុគ្គលិក​ពាក់ព័ន្ធ​ទាំងអស់​។​

​​នេះ​ជាការ​ថយចុះ​បន្ទាប់ពី​ករណី​ឆ្លង​ខ្ពស់បំផុត​ដល់​ទៅ ៩៤ករណី​ថ្មី​កាលពី ២សប្តាហ៍​មុន និង​ជាការ​ថយចុះ​ពីរ​សប្តាហ៍​ជាប់​គ្នាបន្ទាប់ពី​កើនឡើង ៦សប្តាហ៍​កន្លងមក​។ ​​ការប្រកួត​នៅ​ក្របខណ្ឌ English Premier League មួយចំនួនទៀត​ត្រូវបាន​លើក​ពេលដែល​ក្នុងនោះ​ចុងក្រោយ បំផុត​ជំនួប​រវាង Everton ទទួល Leicester City នៅ​ថ្ងៃ​អង្គារ​ម្សិលមិញ​ក្រោយពេល Leicester City មិនមាន​កីឡាករ​គ្រប់គ្រាន់​ដើម្បី​បំពេញ​ការប្រកួត​បាន​។​ ​​នេះ​ជា​ប្រកួត​ទី ១៩ ហើយ​នៅក្នុង​រដូវ​កាល​នេះ​ដែល​ត្រូវបាន​លើក​ពេល​ដោយសារ Covid-19​។​

​សប្តាហ៍​មុន​អ្នកចាត់ការ Manchester City លោក Pep Guardiola និង​អ្នកចាត់ការ Burnley លោក Sean Dyche សុទ្ធតែ​រកឃើញ​វិជ្ជមាន និង​បាន​អវត្តមាន​ពី​ការដឹកនាំ​ក្រុម​នៅ​ការប្រកួត FA Cup ជុំ​ទី៣​។ ​​Manchester City បាន​បញ្ជាក់​សប្តាហ៍​មុន​ថា ​លោក Pep Guardiola ស្ថិតក្នុង​ចំណោម​មនុស្ស ២១នាក់​នៅក្នុង​ក្លិប​ដែល​ត្រូវ​បានដាក់​ឱ្យនៅ​ដាច់ដោយឡែក​៕

​អត្ថបទ​៖​នាង សុភា​វុ​ធ