បន្ទាប់ពីប្រធានាធិបតីអាមេរិក លោក Donald Trump បានប្រកាសកាត់បន្ថយពេលវេលាកំណត់រយៈពេល ៥០ថ្ងៃ ដែលលោកបានផ្តល់ឱ្យសមភាគីរុស្ស៊ី លោក Vladimir Putin ដើម្បីឈានដល់បទឈប់បាញ់ជាមួយអ៊ុយក្រែន មកត្រឹមរយៈពេល ១០ ឬ ១២ថ្ងៃវិញ — អត្ថបទវិភាគពីសារព័ត៌មាន CNN បានចោទសួរថាតើឱសានវាទខ្លីជាងមុននេះអាចនាំមានភាពខុសគ្នាដែរឬទេ ខណៈលោក Trump ផ្ទាល់ក៏ធ្លាប់និយាយពីមុនហើយថា មេដឹកនាំរុស្ស៊ីរូបនេះមិនទាន់ត្រៀមខ្លួនក្នុងការបង្កើតសន្តិភាពនោះទេ។

យ៉ាងណាក្ដី ជោគជ័យសន្តិភាពសម្រាប់អ៊ុយក្រែន ក៏នៅតែស្រពេចស្រពិល។ អត្ថបទ CNN និយាយថា ពេលនេះ អ៊ុយក្រែនកំពុងប្រឈមនឹងពេលវេលាដ៏លំបាកបំផុតលើជួរមុខចាប់តាំងពីការចាប់ផ្តើមនៃសង្រ្គាមមក។ នៅថ្ងៃទី០៣ ខែកញ្ញា - នៅពេលដែលឱសានវាទ ៥០ថ្ងៃដំបូងនឹងកន្លងផុតទៅ - ផលចំណេញជាច្រើនដែលទីក្រុងមូស្គូកំពុងទទួលបានពីសមរភូមិនឹងត្រូវមើលឃើញកាន់តែច្បាស់។

CNN បន្តថា ដោយមើលឃើញពីល្បឿន និងលក្ខណៈយុទ្ធសាស្ត្រនៃការវាយរុលរបស់ទីក្រុងមូស្គូក្នុងពេល ២សប្តាហ៍កន្លងទៅ អ្នកវិភាគគិតថាទំនងជានៅក្នុងប៉ុន្មានសប្តាហ៍ខាងមុខនេះ កងកម្លាំងរបស់រុស្ស៊ីនឹងខិតទៅជិតការឡោមព័ទ្ធទាំងស្រុងលើមជ្ឈមណ្ឌលភាគខាងកើតនៃក្រុង Pokrovsk និង Kostiantynivka និង Kupiansk នៅភាគខាងជើង។

ចំណុចនេះនឹងផ្លាស់ប្តូរយ៉ាងខ្លាំងនូវស្ថានការណ៍ជួរមុខ ហើយនាំឱ្យគោលដៅរបស់លោក Putin ក្នុងការដណ្តើមយកតំបន់ Donetsk ទាំងមូលអាចសម្រេចបាន ខណៈបែបនេះក៏នឹងធ្វើឱ្យការការពារទឹកដីរវាងភាគខាងកើតរបស់អ៊ុយក្រែន និងទីក្រុងគីវ ក្លាយជាបញ្ហាប្រឈមកាន់តែខ្លាំងសម្រាប់រដូវរងាខាងមុខ។

ទោះភាពមិនច្បាស់លាស់នៅតែមានក៏ដោយ ការបន្ថយពេលឱសានវាទរបស់លោក Trump ត្រូវបានស្វាគមន៍នៅទីក្រុងគីវ ជាពិសេសពីសំណាក់ក្រុមមន្រ្តីជំនិតរបស់ប្រធានាធិបតីអ៊ុយក្រែន លោក Volodymyr Zelensky៕