ក្រុមសកម្មប្រយុទ្ធរដ្ឋអ៊ិស្លាម កាលពីថ្ងៃចន្ទ (២៨ កក្កដា) បានចេញមុខអះអាងទទួលខុសត្រូវចំពោះការវាយប្រហារដ៏កាចសាហាវមួយ ដែលបេសកកម្មរបស់អង្គការសហប្រជាជាតិនិយាយថា បានសម្លាប់អ្នកគោរពសាសនាយ៉ាងតិច ៤៣នាក់ ក្នុងអំឡុងពេលពិធីកម្មពេលយប់ក្នុងព្រះវិហារគ្រិស្តមួយកន្លែងនៅភាគខាងកើតប្រទេសកុងហ្គោ។

នៅព្រឹកព្រលឹមថ្ងៃអាទិត្យចុងសប្ដាហ៍ ក្រុមឧទ្ទាមសម្ព័ន្ធមិត្តរដ្ឋអ៊ិស្លាម បានសម្រុកចូលព្រះវិហារមួយនោះនៅភូមិ Komanda ដែលជាភូមិមួយស្ថិតនៅចម្ងាយប្រហែល ៧៥គីឡូម៉ែត្រពីក្រុង Bunia របស់ខេត្ត Ituri ដោយបានកាប់សម្លាប់ដោយប្រើកាំភ្លើង និងកាំបិតវែង និងចាប់ខ្លួនមនុស្សជាច្រើន។ ក្រុមភេរវកររដ្ឋអ៊ិស្លាម បានអះអាងនៅលើបណ្ដាញតេលេក្រាមរបស់ខ្លួនថា ពួកឧទ្ទាមបានសម្លាប់អ្នកទៅព្រះវិហារគ្រិស្តប្រហែល ៤៥នាក់ និងបានដុតបំផ្លាញផ្ទះសម្បែង និងហាងលក់ដូរជាច្រើនកន្លែង។

បេសកកម្មរបស់អង្គការសហប្រជាជាតិ ដែលគេស្គាល់ថាជា MONUSCO និយាយថា យ៉ាងហោចណាស់មនុស្ស ៤៣នាក់ ត្រូវសម្លាប់ ក្នុងនោះមានស្ត្រី ១៩នាក់ និងកុមារ ៩នាក់ ខណៈថ្កោលទោសការវាយប្រហារធ្វើឡើងដោយកងកម្លាំងសម្ព័ន្ធមិត្តប្រជាធិបតេយ្យ (ADF) ដែលពាក់ព័ន្ធជាមួយរដ្ឋអ៊ិស្លាម។

ក្រុមឧទ្ទាម ADF មានប្រភពមកពីប្រទេសជិតខាងអ៊ូហ្គង់ដា ប៉ុន្តែឥឡូវនេះមានមូលដ្ឋាននៅភាគខាងកើតប្រទេសកុងហ្គោ ដែលសម្បូរទៅដោយសារធាតុរ៉ែ។ ក្រុមភេរវករនេះបង្កើនការវាយប្រហារជាញឹកញាប់ ដោយធ្វើឱ្យមានអស្ថិរភាពកាន់តែខ្លាំងនៅក្នុងតំបន់ ដែលក្រុមសកម្មប្រយុទ្ធជាច្រើនប្រកួតប្រជែងដណ្តើមឥទ្ធិពល និងធនធាន៕