អាជ្ញាធរដែនដីហ្កាហ្សា បាននិយាយនៅថ្ងៃចន្ទ (២៨ កក្កដា) ថា កងកម្លាំងអ៊ីស្រាអែល បានបន្តបើកការវាយប្រហារនៅទូទាំងតំបន់ហ្កាហ្សា ដោយបានសម្លាប់ជនជាតិប៉ាឡេស្ទីនចំនួន ១០០នាក់ និងបង្ករបួសជិត ៤០០នាក់ ដោយប្រភពវេជ្ជសាស្រ្តនិយាយថា ក្នុងនោះអ្នកស្លាប់ ៤០ នាក់ ជាអ្នកកំពុងស្វែងរកជំនួយ បើទោះបីជាយោធាអ៊ីស្រាអែល ប្រកាសផ្អាកប្រយុទ្ធនៅតាមទីតាំងមួយចំនួនក៏ដោយ។

នៅក្រោមសម្ពាធអន្តរជាតិកាន់តែធ្ងន់ឡើងដោយសារវិបត្តិភាពអត់ឃ្លានកាន់តែជ្រៅនៅហ្កាហ្សា អ៊ីស្រាអែលបានប្រកាសកាលពីចុងសប្តាហ៍ថា យោធានឹងផ្អាកប្រតិបត្តិការនៅក្នុងទីក្រុង Gaza, Deir al-Balah និង Muwasi រយៈពេល ១០ម៉ោងរៀងរាល់ថ្ងៃ ចាប់ពីម៉ោង ១០ព្រឹក (ម៉ោងក្នុងស្រុក) ដល់ម៉ោង ៨យប់ និងកំណត់ផ្លូវសុវត្ថិភាពសម្រាប់ការផ្តល់ស្បៀងអាហារ ហើយជំនួយតាមអាកាសពីអន្តរជាតិក៏ចាប់ផ្តើមឡើងវិញដែរ។

ទោះបែបនេះក៏ដោយ ទីភ្នាក់ងារជំនួយនិយាយថា វិធានការថ្មីនេះមិនគ្រប់គ្រាន់ដើម្បីទប់ទល់នឹងភាពអត់ឃ្លានដែលកាន់តែអាក្រក់នៅក្នុងទឹកដីនោះទេ។ ទន្ទឹមនឹងនេះ អ៊ីស្រាអែលបញ្ជាក់ថា ខ្លួននឹងនៅតែបន្តប្រតិបត្តិការយោធានៅក្រៅម៉ោង និងទីតាំងកំណត់ផ្អាកប្រយុទ្ធ ស្របពេលវិធានការមនុស្សធម៌ថ្មី។

អ៊ីស្រាអែលបានដាក់ការបិទផ្លូវទាំងស្រុងលើទឹកដីប៉ាឡេស្ទីននេះក្នុងខែមីនា ហើយត្រូវបានដកចេញមួយផ្នែកក្នុងខែឧសភា ប៉ុន្តែមានតែជំនួយមួយក្ដាប់តូចប៉ុណ្ណោះដែលត្រូវបានអនុញ្ញាតឱ្យចូលចាប់តាំងពីពេលនោះមក ទោះបីជាមានការព្រមានពីអង្គការសហប្រជាជាតិ និងអង្គការជំនួយនានាពីភាពអត់ឃ្លានដ៏ធំក៏ដោយ៕