ប្រព័ន្ធផ្សព្វផ្សាយរដ្ឋរបស់ទីក្រុងប៉េកាំង បានរាយការណ៍កាលពីថ្ងៃចន្ទថា រដ្ឋាភិបាលរបស់ប្រទេសចិន នឹងផ្តល់ការឧបត្ថម្ភធនដល់ឪពុកម្តាយនូវប្រាក់ចំនួន ៥០០ដុល្លារសម្រាប់កុមារម្នាក់ ដែលមានអាយុក្រោម ៣ ឆ្នាំ ក្នុងមួយឆ្នាំ ខណៈដែលប្រទេសនេះដែលមានប្រជាជនច្រើនជាងគេទីពីររបស់ពិភពលោក ប្រឈមនឹងវិបត្តិថយចុះចំនួនប្រជាជន ដែលកំពុងកើតឡើង។

ចំនួនប្រជាជនរបស់ប្រទេសនេះ បានធ្លាក់ចុះ ក្នុងរយៈពេល ៣ឆ្នាំ ជាប់ៗគ្នា ជាមួយនឹងគំរូប្រជាជនរបស់អង្គការសហប្រជាជាតិ បានព្យាករថា វាអាចធ្លាក់ចុះពី ១,៤ពាន់លាននាក់ នាពេលបច្ចុប្បន្ន មកត្រឹម៨០០លាននាក់ នៅឆ្នាំ ២១០០។

ទូរទស្សន៍រដ្ឋរបស់ទីក្រុងប៉េកាំង CCTV បាននិយាយថា ការឧបត្ថម្ភធនទូទាំងប្រទេស ត្រូវបានអនុវត្តឡើងវិញ ចាប់ពីថ្ងៃទី ០១ ខែមករា ដោយលើកឡើងពីការសម្រេចចិត្តរបស់បក្សកុម្មុយនីស្ត ដែលកំពុងកាន់អំណាច និងក្រុមប្រឹក្សារដ្ឋ ដែលជាគណៈរដ្ឋមន្ត្រីរបស់ប្រទេសចិន។

ទូរទស្សន៍ CCTV បានបញ្ជាក់ថា៖«នេះគឺជាគោលនយោបាយទូទាំងប្រទេសដ៏សំខាន់មួយ ដែលមានគោលបំណង ធ្វើឲ្យប្រសើរឡើងនូវសុខុមាលភាពសាធារណៈ»។

ទូរទស្សន៍នេះ បានឲ្យដឹងទៀតថា៖«គោលនយោបាយនេះ ផ្តល់ការឧបត្ថម្ភសាច់ប្រាក់ដោយផ្ទាល់ដល់គ្រួសារនៅទូទាំងប្រទេស ដោយជួយកាត់បន្ថយបន្ទុកក្នុងការចិញ្ចឹមកូន»។

មានកំណើតត្រឹមតែ ៩,៥៤លាននាក់ នៅក្នុងប្រទេសចិន កាលពីឆ្នាំមុន ដែលជាចំនួនពាក់កណ្តាលនៃចំនួនកាលពីឆ្នាំ ២០១៦ ដែលជាឆ្នាំដែលខ្លួនបានបញ្ចប់គោលនយោបាយមានកូនតែមួយរបស់ខ្លួន ដែលត្រូវបានអនុវត្តអស់រយៈពេលជាង ៣ ទសវត្សរ៍។