ការិយាល័យរបស់លោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu) បាននិយាយនៅក្នុងសេចក្តីថ្លែងការណ៍មួយថា អ៊ីស្រាអែលមានបំណងបន្តកិច្ចសហប្រតិបត្តិការជាមួយសហគមន៍អន្តរជាតិ រួមទាំងសហរដ្ឋអាមេរិក និងបណ្តាប្រទេសសហភាពអឺរ៉ុប(EU) ដើម្បីធានាដល់ការផ្តល់ជំនួយមនុស្សធម៌ទៅដល់តំបន់ហ្កាហ្សាស្ទ្រីប។

ការិយាល័យនេះ បានបន្តថា៖«អ៊ីស្រាអែលនឹងបន្តធ្វើការជាមួយទីភ្នាក់ងារអន្តរជាតិ ក៏ដូចជាសហរដ្ឋអាមេរិក និង ប្រទេសអឺរ៉ុប ដើម្បីធានាថា ជំនួយមនុស្សធម៌ដ៏ច្រើន ហូរចូលទៅក្នុងតំបន់ហ្កាហ្សាស្ទ្រីប»។

យោងតាមការិយាល័យនាយករដ្ឋមន្ត្រីបានឲ្យដឹងថា កងទ័ពអ៊ីស្រាអែលធ្លាប់បានប្រកាសពីការផ្អាកអរិភាពនៅក្នុង «តំបន់មានប្រជាជនសំខាន់ៗនៃតំបន់ហ្កាហ្សា» ជារៀងរាល់ថ្ងៃ ចាប់ពីម៉ោង ១០:00 ព្រឹក ដល់ ៨:00យប់ ម៉ោងក្នុងស្រុក (ម៉ោង ៧:00 ព្រឹក ដល់៥:០០ល្ងាច ម៉ោងសកល) ដើម្បីធានាបាននូវការចែកចាយជំនួយប្រកបដោយសុវត្ថិភាព។ សេចក្តីថ្លែងការណ៍ បានកត់សម្គាល់ថា៖«យើងអនុញ្ញាតឲ្យផ្តល់ជំនួយមនុស្សធម៌យ៉ាងច្រើន ចូលទៅក្នុងតំបន់ហ្កាហ្សា ជារៀងរាល់ថ្ងៃ រួមទាំងអាហារ ទឹក និងថ្នាំ»។

ការិយាល័យនាយករដ្ឋមន្ត្រី ក៏បានបញ្ជាក់ជាថ្មីពីជំហររបស់រដ្ឋាភិបាលអ៊ីស្រាអែលថា ក្រុមសកម្មប្រយុទ្ធហាម៉ាស កំពុងប្រើប្រាស់ប្រជាជនក្នុងតំបន់នៅតំបន់ហ្កាហ្សា ជាខែលការពារមនុស្ស និងការលួចជំនួ ដែលប្រគល់ទៅឲ្យតំបន់នេះ។ លើសពីនេះទៅទៀតនោះ អ៊ីស្រាអែលបានចោទប្រកាន់ក្រុមហាម៉ាសថា«បានបញ្ចេញតួលេខដែលមិនបានបញ្ជាក់ដល់ប្រព័ន្ធផ្សព្វផ្សាយព័ត៌មាន ខណៈពេលដែលកំពុងផ្សព្វផ្សាយរូបភាព ដែលត្រូវបានធ្វើឡើងយ៉ាងប្រុងប្រយ័ត្ន ឬសម្របសម្រួលដោយក្រុមហាម៉ាស»។