​បាល់ទាត់៖ ​កីឡាករ​ដែលមាន​រហ័ស​នាម​ថា King Kazu កីឡាករ​បាល់ទាត់​ជប៉ុន​ដែលមាន​វ័យ​ដល់​ទៅ ៥៤ឆ្នាំ​ទៅហើយនោះនៅ​មិនទាន់​គិតគូរ​រឿង​ចូលនិវត្តន៍​ពី​អាជីព​កីឡាករ​ឡើយ ក្រោយ​ផ្លាស់​ទៅលេង​ក្លិប​ Suzuka Point Getters នៅ​លី​គ​ទី​៤ របស់​ជប៉ុន​។ ​​ឈ្មោះ​ពេញ​ថា Kazuyoshi Miura នឹង​ឈានចូល​វ័យ ៥៥ឆ្នាំ​នៅ​ខែក្រោយ​នេះហើយបានសំរេច​ផ្លាស់​ទៅ​ក្លិប Suzuka ដែល​កំពុង​ដឹកនាំ​ដោយ​បងប្រុស​របស់ខ្លួន​វ័យ ៥៦ឆ្នាំ Yasutoshi Miura ដែល​ធ្លាប់​ដឹកនាំ​ក្លិប Kagoshima FC​។

​ចាប់ផ្តើម​អាជីព​បាល់ទាត់​ដំបូង​តាំងពី​ឆ្នាំ១៩៨៦ នៅ​ក្លិប​ប្រេ​ស៊ី​ល Santos, Kazuyoshi Miura ធ្លាប់​ឆ្លងកាត់​ការលេង​បាល់​អាជីព​ជាមួយ​ក្លិប​ជាច្រើន មុននឹង​ផ្លាស់​មកកាន់ Yokohama FC នៅ​ឆ្នាំ២០០៥ រហូតមកដល់​ឆ្នាំ២០២១​។ ​​ការផ្លាស់​មកកាន់ Suzuka ដែល​ដឹកនាំ​ដោយ​បងប្រុស​នេះ​គឺ​ស្ថិតក្នុង​កិច្ចសន្យាខ្ចី​ជើង​ប៉ុណ្ណោះ​។ ​​សូមបញ្ជាក់ថា Kazuyoshi Miura កំពុងកាន់​កំណត់ត្រា​ពិភពលោក​កីឡាករ​អាជីព​ដែលមាន​វ័យ​ចំណាស់​បំផុត​។ ​Miura ថែមទាំង​ជា​កីឡាករ​ដែលមាន​វ័យ​ចំណាស់​បំផុត​ ដែល​ប្រកប​អាជីព​នៅ​ក្របខណ្ឌ​បាល់ទាត់​កំពូល​កាលពី​រដូវ​កាល​មុន មុនពេល​ដែល Yokohama FC ត្រូវបាន​កាត់ចេញ​ធ្លាក់​មក​ក្របខណ្ឌ​ទី២ ជប៉ុន​វិញ​៕

​អត្ថបទ​៖​នាង សុភា​វុ​ធ