ប្រធានាធិបតីអាមេរិក លោក Donald Trump នៅថ្ងៃអង្គារ (ទី២៩ ខែកក្កដា) នេះ បានប្រាប់ឲ្យដឹងថា លោកមិនស្វែងរកកិច្ចប្រជុំកំពូលជាមួយប្រធានាធិបតីចិន លោក Xi Jinping នោះឡើយ ប៉ុន្តែលោកបានបន្ថែមថា លោកអាចនឹងទៅបំពេញទស្សនកិច្ចនៅប្រទេសចិនតាមការអញ្ជើញរបស់លោក Xi ដែលលោក Trump បានបញ្ជាក់ថា ត្រូវបានពន្យារពេល។

តាមរយៈបណ្ដាញសង្គម Truth Social របស់លោក លោក Trump បានរៀបរាប់ថា៖ «ខ្ញុំប្រហែលជាទៅប្រទេសចិន ប៉ុន្តែវាលុះត្រាតែជាការអញ្ជើញរបស់លោកប្រធានាធិបតី Xi ដែលត្រូវបានពន្យារពេលប៉ុណ្ណោះ។ បើមិនដូច្នោះទេ ខ្ញុំមិនចាប់អារម្មណ៍ឡើយ»។

នៅមុននេះ ប្រភពបានប្រាប់សារព័ត៌មាន Reuters ថា ទាំងជំនួយការរបស់លោក Trump និងលោក Xi បានពិភាក្សាអំពីលទ្ធភាពនៃជំនួប រវាងមេដឹកនាំទាំង២ ក្នុងអំឡុងពេលការធ្វើដំណើររបស់ប្រធានាធិបតីអាមេរិកទៅកាន់តំបន់អាស៊ី នៅចុងឆ្នាំនេះ។

ទស្សនកិច្ចនេះនឹងក្លាយជាការជួបមុខគ្នាដោយផ្ទាល់ជាលើកដំបូង រវាងមេដឹកនាំទាំង២ ចាប់តាំងពីលោក Trump ចូលកាន់តំណែងអាណត្តិទី២ ស្របពេលដែលភាពតានតឹងផ្នែកពាណិជ្ជកម្ម និងសន្តិសុខ រវាងគូប្រជែងមហាអំណាចទាំង២ នៅតែបន្តកើនឡើង។

ប្រភពបានបង្ហើបថា ទោះបីជាផែនការ សម្រាប់កិច្ចប្រជុំមួយ មិនទាន់ត្រូវបានបញ្ជាក់ក៏ដោយ ក៏ការពិភាក្សា រវាងភាគីនៅសងខាងមហាសមុទ្រប៉ាស៊ីហ្វិក បានរួមបញ្ចូលទស្សនកិច្ចរយៈពេលខ្លីរបស់លោក Trump ក្នុងរង្វង់ពេលវេលានៃកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅកូរ៉េខាងត្បូង ឬកិច្ចពិភាក្សា នៅខាងក្រៅព្រឹត្តិការណ៍ ដែលប្រព្រឹត្តទៅពីថ្ងៃទី៣០ ខែតុលា ដល់ថ្ងៃទី១ ខែវិច្ឆិកា៕