មេដឹកនាំកោះតៃវ៉ាន់ លោក Lai Ching-te បានលុបចោលគម្រោងធ្វើដំណើរទៅក្រៅប្រទេស នៅសប្តាហ៍ក្រោយ បន្ទាប់ពីរដ្ឋបាលរបស់លោក Donald Trump មិនផ្ដល់ភ្លើងខៀវដល់ការឈប់សំចតរបស់លោកនៅសហរដ្ឋអាមេរិក ចំពេលមានការព្រួយបារម្ភថា ការធ្វើបែបនោះអាចបង្អាក់កិច្ចចរចាពាណិជ្ជកម្មជាមួយប្រទេសចិន។

តាមរយៈសេចក្ដីថ្លែងការណ៍ កាលពីយប់ថ្ងៃចន្ទ (ទី២៨ ខែកក្កដា) ការិយាល័យមេដឹកនាំកោះ នៅទីក្រុងតៃប៉ិ បានឲ្យដឹងថា មេដឹកនាំរបស់កោះតៃវ៉ាន់ មិនមានគម្រោងធ្វើដំណើរទៅក្រៅប្រទេស នាពេលខាងមុខនោះឡើយ ដោយសារមានភាពចាំបាច់ សម្រាប់ការងារស្តារឡើងវិញពីព្យុះទីហ្វុង នៅភាគខាងត្បូងតៃវ៉ាន់ និងកិច្ចចរចារបញ្ហាពន្ធជាមួយសហរដ្ឋអាមេរិក។

គួរបញ្ជាក់ថា បើយោងតាមសារព័ត៌មាន Bloomberg បានរាយការណ៍នៅដើមខែកក្កដានេះថា លោក Lai មានបំណងឈប់សំចតនៅទីក្រុង New York នាថ្ងៃទី៤ ខែសីហា ហើយបន្ទាប់មក នៅទីក្រុង Dallas ដោយនេះជាផ្នែកនៃការធ្វើដំណើរទៅកាន់សម្ព័ន្ធមិត្តការទូត ប៉ារ៉ាហ្គាយ កាតេម៉ាឡា និងបេលីហ្ស។

បើយោងតាមបុគ្គលដែលដឹងពីបញ្ហានេះ បានឲ្យដឹងថា ផែនការធ្វើដំណើរនោះ បានចាប់ផ្ដើមមានភាពមិនច្បាស់លាស់ កាលពីចុងសប្តាហ៍មុន នៅពេលដែលមន្ត្រីកោះតៃវ៉ាន់មិនអាចទទួលបានការអនុញ្ញាតពីសមភាគីអាមេរិក ដើម្បីផ្តល់ការបន្តទៅមុខ។ បុគ្គលនោះបានបង្ហើបទៀតថា សហរដ្ឋអាមេរិកមានក្ដីបារម្ភកាន់តែខ្លាំងឡើង ដែលថា ដំណើរទស្សនកិច្ចរបស់លោក Lai អាចរំខានដល់កិច្ចចរចាពាណិជ្ជកម្មជាមួយប្រទេសចិន និងលទ្ធភាពនៃការមានជំនួបកំពូលជាមួយប្រធានាធិបតីចិន លោក Xi Jinping។

ប្រភពបានបន្ថែមថា ការស្ទាក់ស្ទើរ ជុំវិញការធ្វើដំណើររបស់លោក Lai នេះ បានធ្វើឲ្យមន្ត្រីមួយចំនួន ទាំងនៅសហរដ្ឋអាមេរិក ក៏ដូចជានៅទីក្រុងតៃប៉ិ ភ័យខ្លាចថា លោកប្រធានាធិបតី Donald Trump អាចនឹងបន្ទន់ជំហរពេក ចំពោះប្រទេសចិន នៅពេលដែលលោកស្វែងរកកិច្ចប្រជុំជាមួយលោក Xi៕