សហរដ្ឋអាមេរិក កាលពីថ្ងៃចន្ទ (ទី២៨ ខែកក្កដា) បានជំរុញក្រុមប្រឹក្សាសន្តិសុខអង្គការសហប្រជាជាតិ (UNSC) កែសម្រួលការដាក់ទណ្ឌកម្ម លើប្រទេសស៊ីរី ដើម្បីជួយឲ្យរដ្ឋាភិបាលរបស់ប្រទេសនេះទទួលបានជោគជ័យលើអ្វីដែលឯកអគ្គរដ្ឋទូតស្តីទីសហរដ្ឋអាមេរិក បានពិពណ៌នាថា ជា «ការប្រយុទ្ធប្រឆាំងនឹងអំពើភេរវកម្ម»។

បន្ទាប់ពីមានសង្គ្រាមស៊ីវិលរយៈពេល ១៣ឆ្នាំ អតីតមេដឹកនាំស៊ីរី លោក Bashar al-Assad ត្រូវបានទម្លាក់ចេញពីតំណែង កាលពីខែធ្នូឆ្នាំមុន អំឡុងការវាយលុកលឿនរហ័សដូចផ្លេកបន្ទោររបស់កងកម្លាំងប្រឆាំងដែលដឹកនាំដោយក្រុម «Hayat Tahrir al-Sham» (HTS) ។

ដោយពីមុនត្រូវបានស្គាល់ថា រណសិរ្ស al-Nusra ក្រុម HTS គឺជាអង្គភាពផ្លូវការរបស់ក្រុមអាល់កៃដា នៅស៊ីរី មុនពេលផ្តាច់ទំនាក់ទំនងជាមួយគ្នា ក្នុងឆ្នាំ២០១៦។ ចាប់តាំងពីខែឧសភាឆ្នាំ២០១៤ ក្រុមនេះបានស្ថិតនៅក្នុងបញ្ជីទណ្ឌកម្មរបស់ UNSC ដែលដាក់លើក្រុមអាល់កៃដា និង ISIS (រដ្ឋឥស្លាម) ហើយត្រូវបានបង្កកទ្រព្យសម្បត្តិសកល និងបម្រាមមិនឲ្យទទួលបានអាវុធ។

សមាជិករបស់ក្រុម HTS មួយចំនួន ក៏ស្ថិតនៅក្រោមការដាក់ទណ្ឌកម្មរបស់អង្គការសហប្រជាជាតិ (UN) ផងដែរ ដែលមានដូចជាបម្រាមមិនឲ្យធ្វើដំណើរ ការបង្កកទ្រព្យសម្បត្តិ និងការហាមឃាត់មិនឲ្យមានអាវុធ ក្នុងនោះរួមទាំងមេដឹកនាំរបស់ក្រុម គឺលោក Ahmed al-Sharaa ដែលឥឡូវនេះ ជាប្រធានាធិបតីរបស់ប្រទេសស៊ីរី។

តែយ៉ាងណាក្ដី កាលពីថ្ងៃចន្ទ លោកស្រី Dorothy Shea ឯកអគ្គរដ្ឋទូតស្តីទីសហរដ្ឋអាមេរិកប្រចាំនៅ UN បាននិយាយថា សហរដ្ឋអាមេរិកកំពុងធ្វើការជាមួយសមាជិកក្រុមប្រឹក្សាសន្តិសុខ ដើម្បីពិនិត្យឡើងវិញនូវការដាក់ទណ្ឌកម្មទាក់ទងនឹងស៊ីរី។ លោកស្រី Shea បានប្រាប់កិច្ចប្រជុំក្រុមប្រឹក្សាសន្តិសុខស្តីពីស៊ីរីថា៖ «រដ្ឋាភិបាលស៊ីរី បានប្តេជ្ញាចិត្តយ៉ាងច្បាស់លាស់ ក្នុងការប្រយុទ្ធប្រឆាំងជាមួយក្រុមអាល់កៃដា និង ISIS ហើយក្រុមទាំង២ គឺបង្ហាញយ៉ាងច្បាស់លាស់ថា ពួកគេប្រឆាំង និងកំពុងគម្រាមបំផ្លាញរដ្ឋាភិបាលថ្មី ។ សមាជិកក្រុមប្រឹក្សាមិនគួរទទួលមើលស្រាលការគំរាមកំហែងទាំងនោះទេ»។ 

លោកស្រីបានបញ្ជាក់ថា៖ «ក្រុមប្រឹក្សាអាច និងត្រូវតែ កែសម្រួលការដាក់ទណ្ឌកម្មរបស់ខ្លួន ដើម្បីឲ្យរដ្ឋាភិបាលស៊ីរី អាចយកឈ្នះ ក្នុងការប្រយុទ្ធប្រឆាំងនឹងអំពើភេរវកម្ម ខណៈពេលដែលបន្តកំណត់នូវតួអង្គគ្រោះថ្នាក់បំផុត និងអង្គការចាត់តាំងនានា»៕