រុស្ស៊ី៖ ប្រទេសរុស្ស៊ីគ្រោងនឹងដាក់ចេញនូវការទាមទាររបស់ខ្លួន សម្រាប់ការធានាសន្តិសុខនៅក្នុងទ្វីបអឺរ៉ុបចំពោះសម្ព័ន្ធមិត្តចំនួន ៣០ របស់ណាតូនៅថ្ងៃពុធនេះ បន្ទាប់ពីកិច្ចពិភាក្សាដ៏តឹងតែងជាមួយសហរដ្ឋអាមេរិកក្នុងទីក្រុងហ្សឺណែវ ដែលបានបញ្ជាក់ថា ភាគីទាំងពីរនៅតែមានការខ្វែងគំនិតគ្នាលើបញ្ហាសំខាន់ៗជាច្រើន ឈានឆ្ពោះទៅរកការបន្ធូរបន្ថយភាពតានតឹង។
ក្រុមប្រឹក្សាណាតូ- រុស្ស៊ីនៅទីស្នាក់ការអង្គការនេះក្នុងទីក្រុងព្រូសែល គឺជាផ្នែកមួយនៃកិច្ចខិតខំប្រឹងប្រែងកាន់តែទូលំទូលាយថែមទៀត ក្នុងការកាត់បន្ថយភាពតានតឹងយ៉ាងខ្លាំងរវាងលោកខាងកើត និងលោកខាងលិចដោយសារតែសង្គ្រាមត្រជាក់ ដែលជំរុញឲ្យមានការប្រឈមដាក់គ្នាជុំវិញបញ្ហាប្រទេសអ៊ុយក្រែន ដែលសហរដ្ឋអាមេរិកលើកឡើងថា រុស្ស៊ីកំពុងមានគម្រោងឈ្លានពាន។ ទីក្រុងម៉ូស្គូបានច្រានចោលការអះអាងនេះ ទោះបីជាខ្លួនកំពុងដាក់ពង្រាយកងទ័ពជាង ១០ម៉ឺននាក់នៅជិតព្រំដែនអ៊ុយក្រែនក៏ដោយ។ ក្រុមអ្នកការទូតអង្គការណាតូបាននិយាយថា សម្ព័ន្ធមិត្តលោកខាងលិចកំពុងរៀបចំការចរចាជាមួយទីក្រុងម៉ូស្គូ ជុំវិញការធ្វើសមយុទ្ធយោធាដោយបើកចំហរ និងបញ្ចៀសការប៉ះទង្គិចគ្នាដោយអចេតនាដែលឈានទៅដល់ការផ្ទុះចេញជាសង្គ្រាម ជាការដាក់បន្ទុកបន្ថែមទៀតលើការគ្រប់គ្រងអាវុធ និងមីស៊ីលនៅអឺរ៉ុប៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
