អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei បាននិយាយថា ប្រទេសរបស់លោកពុំទាន់មានផែនការសម្រាប់ការបន្តកិច្ចចរចានុយក្លេអ៊ែរជាមួយសហរដ្ឋអាមេរិកនៅឡើយ។ លោក បាននិយាយដូច្នេះនៅក្នុងសន្និសីទសារព័ត៌មានប្រចាំសប្តាហ៍ ខណៈកំពុងធ្វើអត្ថាធិប្បាយអំពីលទ្ធភាពនៃការបន្តការចរចាស្តីពីកម្មវិធីនុយក្លេអ៊ែររបស់ទីក្រុងតេអេរ៉ង់ និងការដកទណ្ឌកម្មរបស់សហរដ្ឋអាមេរិក។

លោកនិយាយថា «សម្រាប់ពេលនេះ យើងពុំទាន់មានផែនការក្នុងរឿងនៅឡើយ។ យើងនឹងធ្វើការសម្រេចចិត្ត នៅពេលណាដែលផលប្រយោជន៍របស់អ៊ីរ៉ង់អំពាវនាវឱ្យមានផែនការនេះ»។

លោកបានរិះគន់សហរដ្ឋអាមេរិកចំពោះតួនាទីរបស់ខ្លួនសម្រាប់សង្គ្រាមលើប្រទេសអ៊ីរ៉ង់ធ្វើឡើងដោយប្រទេសអ៊ីស្រាអែលកាលពីខែមុន ដោយបាននិយាយថា វា «មិនធ្លាប់មានពីមុនមក» នៅពេលដែលប្រទេសទាំងពីរកំពុងចរចា «ភាគីម្ខាង បានជំរុញឱ្យអ្នកតំណាងរបស់ខ្លួនធ្វើការឈ្លានពានដោយយោធាប្រឆាំងនឹងភាគីម្ខាងទៀតនិងបានវាយប្រហារលើរោងចក្រនុយក្លេអ៊ែរដំណើរការដោយសន្តិវិធី ដែលស្ថិតនៅក្រោមការត្រួតពិនិត្យរបស់ទីភ្នាក់ងារថាមពលអាតូមិកអន្តរជាតិ»។

លោកបាននិយាយបន្ថែមថា តម្រូវការជាមុនចម្បងសម្រាប់ការចរចានៅពេលអនាគតគឺការផ្លាស់ប្តូរឥរិយាបទ និងវិធីសាស្រ្តរបស់សហរដ្ឋអាមេរិក ឈានទៅរកគោលការណ៍នៃការចរចា ដោយសង្កត់ធ្ងន់ថា ការចរចាមិនគួរក្លាយជាឧបករណ៍សម្រាប់ការគំរាមកំហែង និងការបំភិតបំភ័យនោះទេ។

អ៊ីស្រាអែល បានបើកការវាយប្រហារតាមអាកាសយ៉ាងខ្លាំងទៅលើតំបន់ជាច្រើនក្នុងប្រទេសអ៊ីរ៉ង់កាលពីថ្ងៃទី១៣ ខែមិថុនា រួមទាំងទីតាំងនុយក្លេអ៊ែរនិងទីតាំងយោធា បន្ទាប់មកការវាយប្រហារតាមអាកាសរបស់សហរដ្ឋអាមេរិកទៅលើទីតាំងនុយក្លេអ៊ែរអ៊ីរ៉ង់ចំនួន៣កន្លែង បានធ្វើឡើងកាលពីថ្ងៃទី២២ ខែមិថុនា។ ក្រោយការប្រយុទ្ធគ្នារយៈពេល១២ថ្ងៃ បទឈប់បាញ់រវាងអ៊ីរ៉ង់និងអ៊ីស្រាអែល ត្រូវបានឈានដល់នៅថ្ងៃទី២៤ ខែមិថុនា។