​កោះ​តៃវ៉ាន់៖ កងកម្លាំង​ទ័ពអាកាស​របស់​កោះ​តៃវ៉ាន់​កាលពី​ថ្ងៃ​អង្គារ បាន​ផ្អាក​ដំណើរ​ការ​ធ្វើ​សម​យុទ្ធ​យន្តហោះ​ចម្បាំង F-16 របស់​ខ្លួន បន្ទាប់ពី​យ​ន្ត​ហោះ​ចម្បាំង​គំរូ​ទើប​អភិវឌ្ឍន៍​ថ្មី​មួយ​គ្រឿង​បាន​ធ្លាក់​ចូល​សមុទ្រ នៅ​ក្នុង​ហេតុការណ៍​ចុងក្រោយ​បំផុត​នៃ​ឧបទ្ទវហេតុ​ជា​បន្តបន្ទាប់​។

​ក្រសួង​ការពារ​ជាតិ​របស់​កោះ​នេះ​បាន​និយាយ​ថា ​យន្តហោះ​ចម្បាំង F-16V ដែល​ជា​ប្រភេទ​ទំនើប​បំផុត​របស់​កង​នាវា​កោះ​តៃវ៉ាន់ បាន​បាត់​ចេញពី​ប្រព័ន្ធ​រ៉ា​ដា​បន្ទាប់ពី​ហោះ​ឡើង​ចេញពី​មូលដ្ឋាន​ទ័ពអាកាស Chiayi Air ក្នុង​កោះ​តៃវ៉ាន់​ភាគ​ខាង​ត្បូងសម្រាប់​បេសកកម្ម​ហ្វឹកហ្វឺន​នៅ​តំបន់​ឆ្នេរ​។ ​អ្នកនាំពាក្យ​របស់​មេដឹកនាំ​កោះ​នេះ​បាន​និយាយ​ថា មេដឹកនាំ​លោកស្រី Tsai Ing-wen បាន​ចេញ​ការ​ណែនាំ​ឲ្យ​បង្កើន​កិច្ច​ខិតខំ​ប្រឹង​ឥត​សម្រាកក្នុង​បេសកកម្មស្វែងរក ​និង​សង្គ្រោះ និង​រក​មូលហេតុ​នាំ​ឲ្យ​មាន​ឧបទ្ទវ​ហេតុនេះ​កើតឡើង។ ​មជ្ឈមណ្ឌល ទី​បញ្ជា​ជួយសង្គ្រោះរបស់​រដ្ឋាភិបាល​បាន​និយាយ​ថា សាក្សី​បាន​មើល​ឃើញ​យន្តហោះ​ធ្លាក់​ចូល​សមុទ្រ ហើយ​ឧទ្ធម្ភាគចក្រ ​និង​នាវា​ជាច្រើន​គ្រឿងកំពុង​ស្វែង​រក​អ្នកបើកបរ​យន្តហោះ​នោះ​៕​

អត្ថបទ៖ សុខមាន