រដ្ឋមន្រ្តីការបរទេសកូរ៉េខាងត្បូងលោក Cho Hyun និយាយកាលពីថ្ងៃអង្គារថា លោកនឹងមានជំនួបលើកដំបូងជាមួយសមភាគីជប៉ុនលោក Takeshi Iwaya នៅទីក្រុងតូក្យូ ចាប់តាំងពីលោកឡើងកាន់តំណែងនៅក្នុងខែនេះ មុនពេលធ្វើដំណើរទៅកាន់សហរដ្ឋអាមេរិក ដើម្បីគាំទ្រកិច្ចចរចាពាណិជ្ជកម្ម ។

លោក Cho នឹងមានជំនួបលើកដំបូងរបស់លោកជាមួយរដ្ឋមន្រ្តីការបរទេសសហរដ្ឋអាមេរិកលោក Marco Rubio នៅថ្ងៃព្រហស្បតិ៍ ស្របពេលដែលទីក្រុងសេអ៊ូល ធ្វើការជំរុញផ្តាច់ព្រ័ត្រ ដើម្បីទទួលបានកិច្ចព្រមព្រៀងពាណិជ្ជកម្ម កំណត់ផលប៉ះពាល់នៃការទារពន្ធសហរដ្ឋអាមេរិក ដែលគ្រោងនឹងចូលជាធរមាននៅថ្ងៃទី ១ ខែសីហាខាងមុខនេះ ។

លោក Cho និយាយប្រាប់ក្រុមអ្នកសារព័ត៌មាននៅទីក្រុងសេអ៊ូល មុនពេលលោកចេញដំណើរទៅកាន់ប្រទេសជប៉ុនថា កិច្ចចរចាពន្ធជិតបញ្ចប់ហើយ ។ លោកនឹងផ្តល់ការគាំទ្រច្រើនសម្រាប់បញ្ហានេះផងដែរ ។

សម្រាប់ដំណើរទស្សនកិច្ចរបស់លោកទៅកាន់ប្រទេសជប៉ុន លោក Cho និយាយថា លោកនឹងពិភាក្សាលើបញ្ហាទ្វេភាគីដ៏សំខាន់ រួមទាំងជម្លោះជាប្រវត្តិសាស្រ្ត នៅក្នុងគោលដៅអនាគតយូរអង្វែង និងយល់ព្រមសហការណ៍ឆ្ពោះទៅមុខ ។

លោកបន្តថា ពួកយើងនឹងមិនត្រឹមតែពិភាក្សាលើស្ថានភាពអន្តរជាតិទាំងមូលប៉ុណ្ណោះទេ ប៉ុន្តែទំនាក់ទំនងទ្វេភាគីផងដែរ និងស្ថានភាពនៅអាស៊ីឦសាន ក៏ដូចជាពិភាក្សាលើវិធីអភិវឌ្ឍទំនាក់ទំនងកូរ៉េខាងត្បូង-ជប៉ុន ៕