កង់រថយន្តត្រូវបានគេដុតនៅក្នុងរដ្ឋធានីប្រទេសអង់ហ្គោឡា ស្របពេលដែលក្រុមអ្នកស្រុកនាំគ្នាតវ៉ាប្រឆាំងនឹងការហក់ឡើងខ្ពស់តម្លៃប្រេងឥន្ធនៈ ។

ទីភ្នាក់ងារព័ត៌មានរ៉យទ័រ អាចបញ្ជាក់បានទីតាំងនៃអំពើហិង្សា តាមរយៈអគារ និងប្លង់ផ្លូវ ដែលបានផ្គូរផ្គងជាមួយរូបភាពផ្កាយរណបនៅតំបន់នោះ ។

សារព័ត៌មានក្នុងស្រុក រាយការណ៍ថា បាតុកម្មនេះ ប្រែក្លាយជាអំពើហិង្សា ក្នុងនោះមនុស្សជាច្រើននាក់ត្រូវបានសម្លាប់ និងមនុស្សជាច្រើននាក់ផ្សេងទៀត ត្រូវបានចាប់ខ្លួន បន្ទាប់ពីឧបទ្ទេវហេតុលួចទំនិញ និងការប៉ះទង្គិចគ្នាជាមួយក្រុមនគរបាល ។

ក្រុមអាជ្ញាធរបានបញ្ចេញសេចក្តីថ្លែងការណ៍បញ្ជាក់ថា ការចាប់ខ្លួនមនុស្សត្រូវបានធ្វើឡើង ប៉ុន្តែពួកគេពុំបានផ្តល់តួលេខជាក់លាក់នោះទេ ។

ប្រទេសផលិតប្រេងនៅអាហ្វ្រិកខាងត្បូងមួយនេះ បានដំឡើងថ្លៃប្រេង ១ភាគ៣ក្នុងខែនេះ ដែលជាផ្នែកមួយនៃកិច្ចខិតខំរបស់រដ្ឋាភិបាលកាន់អំណាចយូរ ក្នុងការទប់ស្កាត់ឧបត្ថម្ភធន និងគាំទ្រហិរញ្ញវត្ថុសាធារណៈ ។

រដ្ឋមន្រ្តីហរិញ្ញវត្ថុអង់ហ្គោឡា និយាយប្រាប់ទីភ្នាក់ងារព័ត៌មានរ៉យទ័រកាលពីខែតុលាថា ឧបត្ថម្ភធនប្រេង ស្មើនឹងប្រហែល ៤ភាគរយនៃទិន្នផលសេដ្ឋកិច្ចកាលពីឆ្នាំមុន ហើយរដ្ឋាភិបាលនឹងបន្តដកវាចេញ តាមដំណាក់កាល ។

គួររំឭកថា ការហក់ឡើងខ្ពស់តម្លៃប្រេងសាំងកាលពីឆ្នាំ ២០២៣ បង្កឲ្យមានបាតុកម្មស្លាប់មនុស្សបែបនេះផងដែរ ៕