ប្រទេសអ៊ីរ៉ង់ នៅថ្ងៃអង្គារ (ទី២៩ ខែកក្កដា) នេះ បានបញ្ជាក់ថា ខ្លួនមិនបានជ្រៀតជ្រែកដល់ដំណើរការចរចាដែលមានគោលបំណងធានាឲ្យមានបទឈប់បាញ់នៅតំបន់ហ្កាហ្សានោះឡើយ បន្ទាប់ពីប្រធានាធិបតីអាមេរិក លោក Donald Trump បានអះអាងថា ទីក្រុងតេអេរ៉ង់ បានចេញ «បញ្ជា» ដល់ក្រុមហាម៉ាសប៉ាឡេស្ទីន។

ដោយនិយាយទៅកាន់អ្នកសារព័ត៌មានកាលពីថ្ងៃចន្ទ (ទី២៨ ខែកក្កដា) អំឡុងដំណើរទស្សនកិច្ច នៅប្រទេសស្កុតឡែន លោក Trump បានប្រាប់ថា អ៊ីរ៉ង់បាន «បញ្ចូលខ្លួនឯងទៅក្នុងដំណើរការចរចាចុងក្រោយ» រវាងអ៊ីស្រាអែល និងក្រុមហាម៉ាស ដែលបានបញ្ចប់ទៅកាលពីសប្តាហ៍មុន ដោយមិនមានការទម្លាយភាពទាល់ច្រក។

ដោយមិនបានបញ្ជាក់លម្អិត លោក Trump បាននិយាយថា៖ «ខ្ញុំគិតថា ពួកគេបានចូលរួមក្នុងការចរចានេះ ដោយប្រាប់ក្រុមហាម៉ាស ពោលគឺផ្តល់សញ្ញា និងបញ្ជាដល់ក្រុមហាម៉ាស ដែលវាមិនមែនជារឿងល្អសោះ»។

អ៊ីរ៉ង់ដែលជាសម្ព័ន្ធមិត្តដ៏ជិតស្និទ្ធ និងគាំទ្រក្រុមហាម៉ាស បានច្រានចោលការលើកឡើងរបស់លោក Trump ដោយចាត់ទុកថា ជាការនិយាយដោយ «គ្មានមូលដ្ឋានអ្វីសោះ»។

អ្នកនាំពាក្យក្រសួងការបរទេស លោក Esmaeil Baqaei បានហៅការអះអាងនេះថា ជាទម្រង់នៃការព្យាករ និងការគេចវេសពីការទទួលខុសត្រូវ និងបិទបាំងកំហុស។

យោងតាមលោក Baqaei បានឲ្យដឹងថា អ្នកចរចារបស់ក្រុមហាម៉ាស «មិនត្រូវការអន្តរាគមន៍ពីភាគីទី៣» ឡើយ ខណៈដែលក្រុមនេះ «ទទួលស្គាល់ និងស្វែងរកផលប្រយោជន៍របស់ប្រជាជនដែលត្រូវបានជិះជាន់ នៅតំបន់ហ្កាហ្សា តាមវិធីសាស្ត្រសមស្របបំផុត»៕