ក្រុមមន្រ្តីរាប់សិបនាក់ បានជួបជុំគ្នានៅកិច្ចប្រជុំអង្គការសហប្រជាជាតិកាលពីថ្ងៃចន្ទ ដើម្បីជំរុញឲ្យពិភពលោកធ្វើការឆ្ពោះទៅរកដំណោះស្រាយរដ្ឋ ២រវាងអ៊ីស្រាអែល និងប៉ាឡេស្ទីន ប៉ុន្តែសហរដ្ឋអាមេរិក និងអ៊ីស្រាអែល បានធ្វើពហិការកិច្ចប្រជុំមួយនេះ ។

មហាសន្និបាតអង្គការសហប្រជាជាតិ(UN)ដែលមានសមាជិក ១៩៣ប្រទេស បានសម្រេចចិត្តកាលពីខែកញ្ញា ឆ្នាំមុនថា កិច្ចប្រជុំបែបនេះ ត្រូវរៀបចំឡើងនៅឆ្នាំ ២០២៥ ។ ធ្វើជាម្ចាស់ផ្ទះដោយបារាំង និងអារ៉ាប៊ីសាអ៊ូឌីត កិច្ចប្រជុំនេះ ត្រូវបានផ្អាកកាលពីខែមិថុនា ក្រោយអ៊ីស្រាអែលវាយប្រហារអ៊ីរ៉ង់ ។

បន្ទាប់ពីកិច្ចប្រជុំនៅពេលព្រឹក រដ្ឋមន្រ្តីការបរទេសអារ៉ាប៊ីសាអ៊ូឌីតលោក Faisal bin Farhan Al-Saud និងរដ្ឋមន្រ្តីការបរទេសបារាំងលោក Jean-Noel Barrot បានថ្លែងទៅកាន់សារព័ត៌មាននៅ UN ។ 

លោក Al-Saud បានអំពាវនាវឲ្យមានការគាំទ្រពីសហរដ្ឋអាមេរិក ដោយលោកថ្លែងថា សហរដ្ឋអាមេរិក គឺជាតួអង្គសំខាន់ចាំបាច់ ហើយច្បាស់ណាស់ថាជាតួអង្គដ៏សំខាន់ពាក់ព័ន្ធនឹងសន្តិភាពនៅតំបន់មជ្ឈិមបូព៌ា ។

លោក Al-Saud បន្តថា លោកជឿជាក់យ៉ាងច្បាស់ថា ការរួមចំណែករបស់សហរដ្ឋអាមេរិក ពិសេសការចូលរួមចំណែករបស់លោកប្រធានាធិបតី Trump អាចជាកាតាលីករសម្រាប់ការបញ្ចប់វិបត្តិភ្លាមៗនៅតំបន់ហ្គាហ្សា និងដំណោះស្រាយរយៈពេលយូរសម្រាប់ជម្លោះអ៊ីស្រាអែល-ប៉ាឡេស្ទីន ។

ទោះបីជាយ៉ាងណាក៏ដោយ សហរដ្ឋអាមេរិក បានចាត់ទុកកិច្ចប្រជុំ UNនេះថា ជា “ព្រឹត្តការណ៍ទាក់ទាញចំណាប់អារម្មណ៍” ។

ដោយឡែក រដ្ឋមន្រ្តីការបរទេសបារាំងលោក Jean-Noel Barrot បានធ្វើសេចក្តីអត្ថាធិប្បាយនៅក្នុងសន្និសន្និសីទសារព័ត៌មាននោះថា នេះគឺជាព្រឹត្តការណ៍ជាប្រវត្តិសាស្រ្ត ព្រឹត្តការណ៍នៅលើផ្លូវនាំពួកយើងឆ្ពោះទៅកាន់មហាសន្និបាត UNនៅខែកញ្ញាខាងមុខ ៕