អាជ្ញាធរ នៅថ្ងៃអង្គារ (ទី២៩ ខែកក្កដា) នេះ បានឲ្យដឹងថា ទឹកជំនន់គំហុកភ្លាមៗ នៅតំបន់ភ្នំភាគខាងជើងនៃប្រទេសវៀតណាម បានបណ្ដាលឲ្យមានអ្នកស្លាប់យ៉ាងហោចណាស់ ៥នាក់ ខណៈដែលមនុស្សម្នាក់ទៀតនៅតែបាត់ខ្លួន បន្ទាប់ពីមានទឹកជន់។

ក្រសួងកសិកម្មបានប្រកាសឲ្យដឹងនៅថ្ងៃអង្គារនេះថា ភ្លៀងធ្លាក់ខ្លាំងដែលបង្កឲ្យមានទឹកជំនន់គំហុកភ្លាមៗ ត្រូវបានរាយការណ៍កាលពីយប់ថ្ងៃសៅរ៍ចុងសប្ដាហ៍កន្លងមក នៅខេត្ត Son La ដោយបានបំផ្លិចបំផ្លញផ្ទះចំនួន ២២ខ្នង បង្កការខូចខាតជាច្រើនទៀត ហើយបង្ខំឲ្យមនុស្សរាប់សិបគ្រួសារត្រូវជម្លៀសចេញ។

សេចក្តីថ្លែងការណ៍របស់ក្រសួងបានបន្ថែមថា សាកសព ៣នាក់ ត្រូវបានប្រទះឃើញកាលពីថ្ងៃចន្ទ ដោយបន្ថែមពីលើមនុស្ស ២នាក់ផ្សេងទៀត ដែលត្រូវបានរកឃើញស្លាប់ ក្នុងទឹកជំនន់ ដោយការស្វែងរកមនុស្សម្នាក់ទៀតនៅតែបន្តធ្វើ។

ដំណាំជាង ៤៤៥ហិកតា និងគោក្របី និងបសុសត្វចំនួន ២.៦០០ក្បាល ក៏ត្រូវបានទឹកជន់លិចដែរ។ វៀតណាមងាយនឹងកើតមានព្យុះត្រូពិចណាស់ ដែលជារឿយៗបណ្តាលឲ្យមានទឹកជំនន់គំហុកភ្លាមៗ និងបំណាក់ដី។

កាលពីសប្តាហ៍មុន ព្យុះត្រូពិច Wipha បានសម្លាប់មនុស្ស ៣នាក់ និងបានជន់លិចផ្ទះជិត ៤.០០០ខ្នង នៅក្នុងខេត្ត Nghe An ភាគកណ្តាលរបស់ប្រទេសនេះ៕