ភ្លើងឆេះព្រៃបានកើតមាននៅជិតភូមិ Canelas ស្ថិតក្នុងតំបន់ Arouca ប្រទេសព័រទុយហ្គាល់ ហើយក្រុមភ្នាក់ងារពន្លត់អគ្គិភ័យ ៥០០នាក់ បានព្យាយាមទប់ស្កាត់អណ្តាតភ្លើង ដែលបានឆាបឆេះឡើងកាលពីថ្ងៃចន្ទរហូតមក និងបានបំផ្លិចបំផ្លាញដីព្រៃប្រហែល ៦ពាន់ហិចតា ។

លោក Rafael Soares គឺជាពលរដ្ឋមួយរូបរស់នៅក្នុងភូមិ Canelas ដែលសង្ឃឹមថា ការទម្លាក់ទឹកពីលើអាកាសអាចទប់ស្កាត់ភ្លើងឆេះព្រៃនេះ និយាយថា វាគឺជារឿងដ៏គួរឲ្យក្រៀមក្រំជាទីបំផុត ពេលមើលឃើញភាពខ្ទេចខ្ទាំងបង្កឡើងដោយសារភ្លើងឆេះព្រៃបែបនេះ ។

លោកបន្ត ពួកយើងមាននូវស្ថានភាពតែមួយនៅថ្ងៃទី ១៧ ខែកញ្ញា នៅភូមិ Alvarenga ហើយឥឡូវកើតមាននៅភូមិ Canelas ។ លោកមិនដឹងនោះទេ ថាតើពួកយើងអាចដោះស្រាយបញ្ហាមួយនេះដោយវិធីណា ។ ពួកយើងត្រូវការជំនួយ ត្រូវការការគាំទ្រទម្លាក់ទឹកពីលើអាកាស ។

លោកបញ្ជាក់ទៀតថា ជីវិតនៅតាមតំបន់ជនបទបានផ្លាស់ប្តូរច្រើនណាស់ បម្រែបម្រួលអាកាសធាតុបានធ្វើឲ្យសីតុណ្ហភាពកាន់តែអាក្រក់ខ្លាំង នេះមិនមែនជាភ្លើងឆេះព្រៃកើតឡើងពីធម្មជាតិនោះទេ តែវាបណ្តាលមកពីមនុស្ស ។

គួរឲ្យដឹងថា កាលពីខែកញ្ញា ឆ្នាំ ២០២៤ ដីព្រៃជាង ៦ពាន់ហិចតា ត្រូវបានបំផ្លិចបំផ្លាញដូចគ្នា ដោយភ្លើងឆេះព្រៃនៅជិតភូមិ Alvarenga ស្ថិតក្នុងតំបន់ Arouca ។

ខណៈពេលនោះដែរ ក្រុមអ្នកពន្លត់អគ្គិភ័យបន្តប្រឹងប្រែងយ៉ាងសស្រាក់សស្រាំ ដើម្បីពន្លត់ភ្លើងឆេះព្រៃដែលកំពុងរីករាលដាលនៅខេត្តចំនួន៣ ដាច់ដោយឡែកពីគ្នានៅប្រទេសទួរគី នៅប្រទេសក្រិក និងប្រទេសអាល់បានី ព្រមទាំងនៅប្រទេសប៊ុលហ្គារី ដែលជំរុញដោយខ្យល់បក់ខ្លាំង បន្ទាប់ពីកម្ដៅដ៏ក្ដៅគគុកជាច្រើនថ្ងៃទូទាំងតំបន់សមុទ្រមេឌីទែរ៉ាណេ ៕