ប្រទេសហ្វីលីពីន បាននិយាយនៅថ្ងៃអង្គារនេះថា ខ្លួននឹងស្នើឲ្យ«បណ្តាប្រទេសជាមិត្ត» ដើម្បីជួយធានាដល់ការដោះលែងនាវិកហ្វីលីពីនចំនួន ៥នាក់ ដែលត្រូវបានចាប់ខ្លួនដោយក្រុមឧទ្ទាមហ៊ួទីនៅប្រទេសយេម៉ែន។ 

ក្រុមហ៊ួទីដែលគាំទ្រដោយអ៊ីរ៉ង់កាលពីថ្ងៃចន្ទ បានចេញផ្សាយរូបភាពវីដេអូនៃសមាជិកនាវិកដែលបានបាត់ខ្លួន បន្ទាប់ពីការវាយប្រហារលើនាវាដឹកទំនិញ Eternity C និង Magic Seas ដោយអះអាងនៅក្នុងសេចក្តីថ្លែងការណ៍អមថា បាន «ជួយសង្គ្រោះ»នាវិកទាំងនោះ។

កាលពីសប្តាហ៍មុន អង្គការឃ្លាំមើលសិទ្ធិមនុស្ស បាននិយាយថា ក្រុមឧទ្ទាមកំពុងឃុំខ្លួននាវិកដោយខុសច្បាប់ ហើយថា ការវាយប្រហាររបស់ពួកគេលើការដឹកជញ្ជូនមានចំនួនស្មើនឹងឧក្រិដ្ឋកម្មសង្គ្រាម។ សហរដ្ឋអាមេរិក បានចោទប្រកាន់ក្រុមហ៊ួទីថា បានចាប់ជំរិត។

អនុរដ្ឋមន្ត្រីការបរទេសហ្វីលីពីនលោក Eduardo De Vega បានបញ្ជាក់ថា ក្រុមហ៊ួទី កំពុងកម្មករនាវាហ្វីលិពីនចំនួន៩នាក់។

លោកបាននិយាយថា៖«ខ្ញុំមិនចង់ប្រើពាក្យចំណាប់ខ្មាំងទេ។ យ៉ាងហោចណាស់យើងដឹងថា ពួកគេនៅរស់»។

លោកបានបន្ថែមថា៖«យើងនឹងមិននិយាយដោយផ្ទាល់ជាមួយក្រុមហ៊ួទីទេ។ យើងនឹងស្វែងរកជំនួយពីប្រទេសជាមិត្តទាំងអស់»។