​បាល់ទាត់៖ ​អតីត​ខ្សែ​ការពារ​ក្រុម​ជំរើសជាតិ​ទួរគី​កីឡាករ Ahmet Calik បាន​បាត់​បង់ជីវិត​ដោយ​សារ​គ្រោះថ្នាក់​ចរាចរ​នៅ​ថ្ងៃ​អង្គារ​ម្សិល​មិញ​។ ​នគរបាល​ចរាចរ​ក៏​កំពុង​ស៊ើបអង្កេត​ផង​ដែរ ​ដើម្បី​ឱ្យ​ដឹង​មូលហេតុ​ច្បាស់លាស់ដែល​ឈាន​ដល់​កើតមាន​គ្រោះថ្នាក់​ចរាចរ ​ដ៏​គួរ​ឱ្យ​សោកស្ដាយ​មួយ​នេះ​។

​​Ahmet Calik គឺជា​កីឡាករ​របស់​ក្លិប​ទួរគី Konyaspor តាំងពី​ឆ្នាំ២០២០ ដែល​ផ្ទេរ​ពី Galatasaray​។ ​​ក្លិប​ Konyaspor បាន​ចេញ​សេចក្តី​ថ្លែង​ការ​រំ​លែង​ទុក្ខ​ដ៏​សោកសង្រេង ​ចំពោះ​ការបាត់បង់​កីឡាករ​របស់​ដែលមាន​ទេពកោសល្យ និង​ជាទី​ស្រលាញ់​របស់​អ្នកគាំទ្រ​។ ​​Ahmet Calik បានចាប់ផ្តើម​អាជីព​ជាមួយ​ក្លិប​ Genclerbirligi ដែល​បង្ហាញខ្លួន​បាន​ជាង ៥០ប្រកួត​មុនពេល​ផ្លាស់​ទៅ Galatasaray នៅ​ឆ្នាំ២០១៧​។ Calik ក៏​ធ្លាប់​ជាប់​ជំរើសជាតិ​ទួរគី​ជាច្រើន​ប្រភេទ​អាយុ​ផងដែរ​តាំងពី U-16 ដល់ U-21 និង​ធ្លាប់​ជាប់​ជំរើសជាតិ​ផងដែរ​ចន្លោះ​ឆ្នាំ​២០១៥​-២០១៧ បង្ហាញខ្លួន​បាន ៨ប្រកួត​រកបាន​មួយ​គ្រាប់​។ ​​Ahmet Calik ធ្លាប់​ឈ្នះ​ជើងឯក​លី​គ​កំពូល​ទួរគី Super Lig ជាមួយ Galatasaray ពីរលើក, ឈ្នះ​ជើងឯក​ទួ​រគី​ខាប់​ ១​លើក និង​ពាន​ទួរគី​ស៊ូ​ពើ​ខាប់​ ១​លើក​៕

​អត្ថបទ​៖​នាង សុភា​វុ​ធ