ប្រធានាធិបតី Volodymyr Zelenskyy នៅថ្ងៃអង្គារ (ទី២៩ ខែកក្កដា) នេះ បានលើកឡើងថា ការវាយប្រហារតាមអាកាសរបស់រុស្ស៊ីលើពន្ធនាគារ ក្នុងប្រទេសអ៊ុយក្រែន «មិនមែនជារឿងចៃដន្យឡើយ» ហើយថា ត្រូវតែមានការបង្ខំឲ្យរុស្ស៊ី «បញ្ឈប់ការសម្លាប់ និងបង្កើតសន្តិភាព»។

តាមរយៈសេចក្តីថ្លែងការណ៍ នៅលើបណ្ដាញសង្គម លោក Zelenskyy បានឲ្យដឹងថា៖ «វាគឺជាការវាយប្រហារដោយចេតនា មានបំណង ពោលគឺមិនមែនកើតឡើងដោយចៃដន្យនោះឡើយ។ រុស្ស៊ីមិនអាចមិនដឹងថា ពួកគេកំពុងតម្រង់គោលដៅទៅលើជនស៊ីវិលនៅកន្លែងនោះឡើយ»។

គួរបញ្ជាក់ថា នៅថ្ងៃអង្គារនេះ ទីក្រុងគីវ បានបញ្ជាក់ថា ការវាយប្រហារតាមអាកាសរបស់រុស្ស៊ីលើពន្ធនាគារមួយ នៅភាគអាគ្នេយ៍ប្រទេស នាពេលយប់ បានសម្លាប់អ្នកទោសចំនួន ១៧នាក់ ហើយរាប់សិបនាក់ផ្សេងទៀតរងរបួស។

ការវាយប្រហារនេះបានកើតឡើងតែប៉ុន្មានម៉ោងប៉ុណ្ណោះបន្ទាប់ពីប្រធានាធិបតីអាមេរិក លោក Donald Trump បានចេញពេលវេលាកំណត់ថ្មី សម្រាប់ទីក្រុងមូស្គូ ដើម្បីបញ្ចប់ការលុកលុយរបស់ខ្លួនលើអ៊ុយក្រែន ដែលឥឡូវនេះចូលដល់ឆ្នាំទី៤ ឬបើមិនដូច្នោះទេ ត្រូវប្រឈមមុខនឹងទណ្ឌកម្មថ្មីដ៏ធ្ងន់ធ្ងរ៕