នៅថ្ងៃអង្គារ (ទី២៩ ខែកក្កដា) នេះ វិមានក្រឹមឡាំង បានបញ្ជាក់ថា ប្រទេសរុស្ស៊ីនៅតែប្តេជ្ញាចិត្ត ក្នុងការសម្រេចឲ្យបាននូវសន្តិភាពនៅក្នុងប្រទេសអ៊ុយក្រែន ដោយនេះជាការមានប្រតិកម្មដំបូង ចំពោះការបន្ថយពេលវេលាកំណត់របស់ប្រធានាធិបតីអាមេរិក Donald Trump ដើម្បីឲ្យទីក្រុងមូស្គូឈានដល់បទឈប់បាញ់ នៅក្នុងជម្លោះនេះ។

គួរបញ្ជាក់ថា ប្រធានាធិបតីអាមេរិក នៅព្រឹកថ្ងៃនេះ បានប្រាប់ថា លោកនឹងកាត់បន្ថយរយៈពេលកំណត់ ៥០ថ្ងៃដំបូងរបស់លោក ឲ្យមកនៅ «ប្រហែលជា ១០ ឬ ១២ថ្ងៃ» ហើយថា លោកមិនចាប់អារម្មណ៍ក្នុងការនិយាយជាមួយប្រធានាធិបតីរុស្ស៊ី លោក Vladimir Putin ទៀតទេ។

ដោយប្រើប្រាស់ពាក្យសម្ដីរបស់រុស្ស៊ី សំដៅដល់ការវាយលុករបស់ខ្លួន អ្នកនាំពាក្យ លោក Dmitry Peskov បាននិយាយថា៖ «យើងបានដឹងពីសេចក្តីថ្លែងការណ៍របស់លោកប្រធានាធិបតី Trump កាលពីម្សិលមិញ។ SVO (ប្រតិបត្តិការយោធាពិសេស) នៅតែបន្តមានដដែល»។

ហើយជាមួយគ្នានេះ លោក Peskov ក៏បានកត់សម្គាល់ផងដែរពីការធ្លាក់ចុះនូវកិច្ចប្រឹងប្រែង ដើម្បីស្តារទំនាក់ទំនងជាមួយសហរដ្ឋអាមេរិកឡើងវិញ បន្ទាប់ពីមាននូវការអត្ថាធិប្បាយរបស់លោក Trump។ អ្នកនាំពាក្យរូបនេះ បានបន្ថែមថា៖ «យើងចង់ឃើញភាពសកម្មបន្ថែមទៀត។ យើងចាប់អារម្មណ៍លើកិច្ចប្រឹងប្រែងនេះ។ ដើម្បីឆ្ពោះទៅមុខ យើងត្រូវការកម្លាំងជំរុញពីភាគីទាំង២»។

ប៉ុន្តែយ៉ាងណាក្ដី លោក Peskov បានបញ្ជាក់ថា ទីក្រុងមូស្គូនៅតែ «ប្តេជ្ញាចិត្តចំពោះដំណើរការសន្តិភាព ដើម្បីដោះស្រាយជម្លោះ នៅអ៊ុយក្រែន និងធានាផលប្រយោជន៍របស់យើង»៕