ក្រុមមន្ត្រីបាននិយាយថា គ្រោះរញ្ជួយដីកម្រិត ៨,៧រ៉ិចទ័រ បានវាយប្រហារលើឧបទ្វីប Kamchatka ភាគខាងកើតប្រទេសរុស្ស៊ី ក្នុងថ្ងៃពុធ ៣០ កក្កដា នេះ ដោយបង្កើតឱ្យមានរលកយក្សស៊ូណាមិ កម្ពស់រហូតដល់ទៅ ៤ម៉ែត្រ ដែលជំរុញឱ្យមានការជម្លៀសខ្លួន និងខូចខាតអគារនានា។

ជប៉ុន និងសហរដ្ឋអាមេរិក ក៏បានចេញការព្រមានអាសន្នពីរលកយក្សស៊ូណាមិ និងបញ្ជាជម្លៀសនៅថ្ងៃពុធដដែលនេះ បន្ទាប់ពីគ្រោះរញ្ជួយដីនៅរុស្ស៊ី។

អភិបាលតំបន់ Kamchatka លោក Vladimir Solodov បាននិយាយក្នុងវីដេអូមួយបង្ហោះនៅលើកម្មវិធីផ្ញើសារតេលេក្រាមថា "រញ្ជួយដីថ្ងៃនេះគឺធ្ងន់ធ្ងរណាស់ និងខ្លាំងបំផុតក្នុងការរញ្ជួយជាច្រើនទសវត្សរ៍"។ លោកបន្ថែមថា តាមព័ត៌មានបឋមមិនមានមនុស្សរងរបួសទេ ប៉ុន្តែសាលាមត្តេយ្យមួយបានរងការខូចខាត។

លោក Sergei Lebedev រដ្ឋមន្ត្រីប្រចាំតំបន់សម្រាប់ស្ថានភាពអាសន្នបាននិយាយថា រលកយក្សស៊ូណាមិ កម្ពស់ពី ៣-៤ម៉ែត្រ ត្រូវបានកត់ត្រានៅក្នុងផ្នែកខ្លះនៃតំបន់ Kamchatka ដោយជំរុញឱ្យប្រជាជនជម្លៀសខ្លួនឱ្យឆ្ងាយចេញពីច្រាំងសមុទ្រនៃឧបទ្វីបនេះ។ ទីភ្នាក់ងារការស្ទាបស្ទង់ភូគព្ភសាស្ត្រអាមេរិក ដែលបានកែប្រែកម្រិតរញ្ជួយពីតួលេខ ៨,០រ៉ិចទ័រពីមុន បាននិយាយថា រញ្ជួយដីនេះមានកម្រិតរាក់ក្នុងជម្រៅ ១៩,៣គីឡូម៉ែត្រ ហើយស្ថិតនៅចំកណ្តាល ១២៦គីឡូម៉ែត្រ ភាគខាងកើតប៉ែកអាគ្នេយ៍នៃតំបន់ Petropavlovsk-Kamchatsky ដែលជាទីក្រុងមានប្រជាជន ១៦៥.០០០នាក់ តាមបណ្តោយឆ្នេរ Avacha Bay។

អាជ្ញាធរអាមេរិកចេញការព្រមានពីរលកយក្សស៊ូណាមិសម្រាប់រដ្ឋអាឡាស្កា និងកោះហាវ៉ៃ ដោយអាចមានរលកកម្ពស់ ៣ម៉ែត្របោកបក់លើកោះហាវ៉ៃ រលកកម្ពស់ដូចគ្នានេះអាចគំរាមកំហែងដល់ទឹកដីកោះហ្គាំ របស់អាមេរិក។ ចំណែកទីភ្នាក់ងារអាកាសធាតុជប៉ុន បង្កើនការព្រមានរបស់ខ្លួន ដោយនិយាយថា រលកយក្សស៊ូណាមិកម្ពស់រហូតដល់ ៣ម៉ែត្រ រំពឹងថានឹងវាយបោកដល់តំបន់ឆ្នេរធំៗ ហើយបញ្ជាជម្លៀសបន្ទាន់ត្រូវបានដាក់ចេញដោយរដ្ឋាភិបាលសម្រាប់តំបន់មួយចំនួនផងដែរ៕