ក្រុមមន្ត្រីសហរដ្ឋអាមេរិក និងចិន បានឯកភាពគ្នាក្នុងការបន្ថែមពេលដល់កិច្ចព្រមព្រៀងបន្ទាបពន្ធរយៈពេល ៩០ថ្ងៃរបស់ភាគីទាំងពីរកាលពីថ្ងៃអង្គារ (២៩ កក្កដា) បន្ទាប់ពីជំនួបរយៈពេល ២ថ្ងៃដែលភាគីទាំងពីរពិពណ៌នាថាជាកិច្ចពិភាក្សាមានលក្ខណៈស្ថាបនានៅរដ្ឋធានីស៊ុយអែត ក្នុងបំណងលុបបំបាត់សង្គ្រាមពាណិជ្ជកម្មដែលកំពុងកើនឡើងរវាងប្រទេសមានសេដ្ឋកិច្ចធំបំផុតទាំងពីររបស់ពិភពលោក ដែលគំរាមកំហែងដល់កំណើនសកល។

ពុំមានវឌ្ឍនភាពសំខាន់ៗណាមួយត្រូវប្រកាសនៅឡើយទេ ហើយមន្ត្រីអាមេរិកនិយាយថា គឺអាស្រ័យលើលោកប្រធានាធិបតីអាមេរិក Donald Trump ក្នុងការសម្រេចចិត្តចុងក្រោយថាតើត្រូវបន្តកិច្ចព្រមព្រៀងពាណិជ្ជកម្មបណ្ដោះអាសន្នដែលផុតកំណត់នៅថ្ងៃទី១២ ខែសីហា ខាងមុខនេះឬទេ ឬក៏អនុញ្ញាតឱ្យពន្ធសងសឹកពីមុនកើនឡើងដល់តួលេខបីខ្ទង់មកវិញ។ ប៉ុន្តែលោក Scott Bessent រដ្ឋមន្ត្រីក្រសួងរតនាគារអាមេរិក បានបង្កើនក្ដីរំពឹងថា លោក Trump ប្រហែលមិនបដិសេធការបន្ថែមពេលនេះទេ។

លោក Bessent បានប្រាប់អ្នកយកព័ត៌មានបន្ទាប់ពីចប់កិច្ចប្រជុំថា "ជំនួបនេះស្ថាបនាខ្លាំងណាស់ ប៉ុន្តែគ្រាន់តែថាក្រុមរបស់លោកមិនទាន់ត្រូវផ្តល់សញ្ញាចុងក្រោយ"។ លោក Bessent បន្តថា លោករំពឹងថានឹងជួបជាមួយលោក Trump នៅថ្ងៃពុធ ៣០ កក្កដា នេះ ក្រោយត្រឡប់ទៅទីក្រុងវ៉ាស៊ីនតោនវិញ ហើយលោក Trump នឹងជាអ្នកសម្រេចចិត្តចុងក្រោយលើការបន្ថែមពេលណាមួយ។ ក្រោយត្រឡប់ទៅទីក្រុងវ៉ាស៊ីនតោនវិញពីដែនដីស្កុតឡែន លោក Trump និយាយថា លោក Bessent ទើបតែបានរាយការណ៍ប្រាប់លោកពីកិច្ចពិភាក្សាជាមួយចិន ប៉ុន្តែប្រធានាធិបតីរូបនេះមិនលម្អិតអ្វីទេ។

បន្ទាប់ពីច្រើនខែនៃការគំរាមកំហែងពន្ធខ្ពស់ខ្លាំងលើដៃគូពាណិជ្ជកម្ម លោក Trump បានសម្រេចកិច្ចព្រមព្រៀងពាណិជ្ជកម្មជាមួយ សហភាពអឺរ៉ុប ជប៉ុន ឥណ្ឌូនេស៊ី និងប្រទេសដទៃមួយចំនួនទៀត ប៉ុន្តែសេដ្ឋកិច្ចមហាអំណាចរបស់ចិន និងការក្ដោបក្តាប់លើលំហូររ៉ែកម្រពិភពលោករបស់ទីក្រុងប៉េកាំង ធ្វើឱ្យកិច្ចពិភាក្សាទាំងនេះស្មុគស្មាញជាពិសេស៕