ចក្រភពអង់គ្លេស បាននិយាយកាលពីថ្ងៃអង្គារ (២៩ កក្កដា) ថា ខ្លួនអាចនឹងទទួលស្គាល់រដ្ឋប៉ាឡេស្ទីនក្នុងខែកញ្ញា ដ៏ឆាប់ខាងមុខនេះ លុះត្រាតែអ៊ីស្រាអែល ចាត់វិធានការបន្ទាន់កាន់តែច្រើនដើម្បីបន្ធូរបន្ថយទុក្ខវេទនានៅតំបន់ហ្កាហ្សា ជាទីដែលភាពអត់ឃ្លានកំពុងរីករាលដាលខ្លាំង ហើយអ៊ីស្រាអែល ត្រូវឈានដល់បទឈប់បាញ់ក្នុងសង្គ្រាមជិត ២ឆ្នាំជាមួយក្រុមហាម៉ាស។

ការព្រមានដែលទាក់ទាញការស្តីបន្ទោសយ៉ាងធ្ងន់ធ្ងរពីអ៊ីស្រាអែលវិញនេះ បានកើតឡើងបន្ទាប់ពីក្រុមឃ្លាំមើលភាពអត់ឃ្លានបាននិយាយថា សេណារីយ៉ូនៃគ្រោះទុរ្ភិក្សដ៏អាក្រក់បំផុតកំពុងលាតត្រដាងនៅហ្កាហ្សា ហើយត្រូវការវិធានការជាបន្ទាន់ដើម្បីជៀសវាងការស្លាប់រីករាលដាល។ អាជ្ញាធរប៉ាឡេស្ទីននិយាយថា ជនជាតិប៉ាឡេស្ទីនជាង ៦ម៉ឺននាក់ ឥឡូវនេះត្រូវបានបញ្ជាក់ថាស្លាប់ ដោយសារការវាយលុករបស់អ៊ីស្រាអែល លើតំបន់ហ្កាហ្សាស្ទ្រីប។

ការព្រមានរបស់នាយករដ្ឋមន្ត្រីអង់គ្លេស Keir Starmer ក្នុងការទទួលស្គាល់រដ្ឋប៉ាឡេស្ទីននេះ ក៏បានបង្កើនសម្ពាធលើអ៊ីស្រាអែលកាន់តែខ្លាំង ស្របពេលការតវ៉ាជាអន្តរជាតិជុំវិញការប្រព្រឹត្តដ៏ឃោរឃៅក្នុងសង្គ្រាម។ នាយករដ្ឋមន្ត្រីអ៊ីស្រាអែល លោក Benjamin Netanyahu បានរិះគន់ក្នុងការបង្ហោះលើបណ្ដាញសង្គម X ថា ការសម្រេចចិត្តរបស់លោក Starmer នេះ "ជាការផ្តល់រង្វាន់ដល់អំពើភេរវកម្មកាចសាហាវរបស់ពួកហាម៉ាស និងដាក់ទណ្ឌកម្មដល់ជនរងគ្រោះទៅវិញ" ដោយបន្ថែមថា "រដ្ឋជីហាដនៅព្រំដែនអ៊ីស្រាអែលក្នុងថ្ងៃនេះ នឹងគំរាមកំហែងដល់ចក្រភពអង់គ្លេសនៅថ្ងៃស្អែក"។

ការទទួលស្គាល់រដ្ឋប៉ាឡេស្ទីននេះ ប្រសិនបើអនុវត្តទៅពិតមែននោះ ភាគច្រើនគ្រាន់តែជានិមិត្តរូបប៉ុណ្ណោះ ដោយអ៊ីស្រាអែលកាន់កាប់ទឹកដីដែលប៉ាឡេស្ទីនមានបំណងចង់បង្កើតរដ្ឋនៅតំបន់ West Bank និងហ្កាហ្សាស្រ្ទីប ដែលមានក្រុងហ្សេរុយសាឡិមខាងកើត ជារដ្ឋធានីរបស់ខ្លួន៕