​សហរដ្ឋអាមេរិក៖ កាលពី​ថ្ងៃ​អង្គារសហរដ្ឋអាមេរិក​បាន​គំរាម​អនុវត្តន៍​វិធានការ​សេដ្ឋកិច្ច​ធ្ងន់ធ្ងរ​លើ​រុស្ស៊ី និង​ជួយ​ការពារ​ផ្នែក​ខាងកើត​របស់​អង្គការ​ណា​តូ ប្រសិនបើ​រុស្ស៊ី​ប្រើប្រាស់​កងទ័ព​ជាង ១០ម៉ឺន​នាក់​ដែល​ខ្លួន​បាន​ប្រមូល​ផ្តុំ​នៅ​តាម​ព្រំដែន​របស់​ខ្លួន ដើម្បី​ពង្រីក​ជម្លោះ​នៅ​អ៊ុយ​ក្រែ​ន​នោះ​។​

​អនុរដ្ឋមន្ត្រី​ក្រសួងការបរទេស​អាមេរិក​ទទួលបន្ទុក​កិច្ចការ​នយោបាយលោកស្រី Victoria Nuland បាន​ប្រាប់​ក្រុម​អ្នកសារព័ត៌មាន​នៅក្រសួងការបរទេសថា ​យើង​នឹង​ឆ្លើយតប​ដោយ​ការដាក់​វិធានការ​សេដ្ឋកិច្ច​ធ្ងន់ធ្ងរ រួមទាំងទណ្ឌកម្ម​ទាំងឡាយ​ដែល​មិនទាន់បាន​ប្រើ​នាពេល​កន្លងមក ដោយ​គំរាម​ពី​ការខូចខាត​យ៉ាងធ្ងន់ធ្ងរ​ដល់​សេដ្ឋកិច្ច និង​ប្រព័ន្ធ​ហិរញ្ញវត្ថុ​របស់​រុស្ស៊ី។ ​កាលពី​ថ្ងៃ​ចន្ទ​ដើម​សប្ដាហ៍​នេះ ឯកអគ្គរដ្ឋទូតសហរដ្ឋអាមេរិក​ប្រចាំ​នៅ​អង្គការសហប្រជាជាតិបាន​និយាយ​ថា​ សហរដ្ឋអាមេរិក និង​សម្ព័ន្ធមិត្ត​របស់ខ្លួនបាន​ត្រៀម​ដាក់ទណ្ឌកម្ម​យ៉ាងធ្ងន់ធ្ងរ​លើ​សេដ្ឋកិច្ច​របស់​រុស្ស៊ី ប្រើ​សិន​ហ៊ាន​ឈ្លានពាន​អ៊ុយ​ក្រែ​ន​។​

​ចំណែក​លោក Antony Blinken ប្រមុខ​ការទូត​អាមេរិកបានបញ្ជាក់​ជាថ្មី​ទៀតថា សហរដ្ឋអាមេរិក​ប្ដេជ្ញា​សងសឹក​រុស្ស៊ីដោយ​ប្រើ​ទណ្ឌកម្ម​លើ​សេដ្ឋកិច្ច​យ៉ាង​ធ្ង​រ​ធ្ង​រ អំឡុង​សន្ទនា​តាម​ទូរស័ព្ទ​កាលពី​ថ្ងៃ​អង្គារ​ជាមួយ​រដ្ឋមន្ត្រីការបរទេស​អ៊ុយ​ក្រែ​នលោក Dmytro Kuleba​។​ ​លោក Ned Price អ្នកនាំពាក្យ​ក្រសួងការបរទេស​អាមេរិក​បានបញ្ជាក់​ពី​ការសន្ទនា​តាម​ទូរស័ព្ទថា លោក Blinken ក៏បាន​សន្យា​ពង្រឹង​វត្តមាន​កងកម្លាំង​រប​ស់​អង្គការ​ណា​តូនៅក្នុង​ខ្សែត្រៀម​ជួរ ជាមួយនឹង​បណ្ដា​រដ្ឋ​ជា​សម្ព័ន្ធមិត្ត​នានា និង​បង្កើន​ជំនួយ​វិស័យ​ការពារជាតិជួយ​ដល់​អ៊ុយ​ក្រែ​ន ប្រសិនបើ​រុស្ស៊ីពង្រីក​ជម្លោះ​កាន់តែ​ធំ​៕

អត្ថបទ៖ សុខមាន