ទីភ្នាក់ងារស្ទាបស្ទង់ភូគព្ភសាស្ត្រអាមេរិក (USGS) បានកែប្រែកម្លាំងនៃគ្រោះរញ្ជួយដី ដែលបានវាយប្រហារឆ្នេរសមុទ្រចុងបូព៌ានៃប្រទេសរុស្ស៊ី នៅវេលាម៉ោង ០៨:២៥នាទីព្រឹក ម៉ោងក្នុងស្រុក នៅថ្ងៃពុធ ៣០ កក្កដា នេះ ឱ្យឡើងដល់កម្រិត ៨,៨រ៉ិចទ័រ យ៉ាងគ្រោះថ្នាក់។

កម្រិត​រញ្ជួយ​ដី​ដំបូង​ត្រូវ​បាន​រាយការណ៍​ថា​មាន​កម្រិត ៨,០រ៉ិចទ័រ ហើយ​ក្រោយ​មក​បាន​កែប្រែ​ឡើង​ដល់ ៨,៧រ៉ិចទ័រវិញ ចំណែកពេលនេះបានកើនកម្លាំងកាន់តែកំណាច។ USGS បន្ថែមថា ​រញ្ជួយ​ដីតូចៗបន្តបន្ទាប់​ជា​ច្រើន​ដែល​ក៏ខ្លាំងក្លាផងដែរក្នុងកម្រិត ៦,៩រ៉ិចទ័រ ​ត្រូវ​បាន​កត់ត្រា​ទុកនៅទីតាំងជាច្រើន។សេចក្ដីរាយការណ៍បានឱ្យដឹងថា គ្រោះរញ្ជួយដីនេះបានបណ្តាលឱ្យខូចខាតដល់អគារ និងរថយន្ត នៅតាមដងផ្លូវក្នុងទីក្រុង Petropavlovsk-Kamchatsky របស់រុស្ស៊ី ដែលមានការដាច់ចរន្តអគ្គិសនីទូលំទូលាយ និងសេវាទូរស័ព្ទចល័តមិនដំណើរការ។

សេចក្ដីរាយការណ៍ពីប្រព័ន្ធផ្សព្វផ្សាយរុស្ស៊ីនៅមុននោះ បានបន្ថែមថា មនុស្សមួយចំនួនបានស្វះស្វែងរកជំនួយផ្នែកវេជ្ជសាស្ត្រនៅឧបទ្វីប Kamchatka បន្ទាប់ពីរញ្ជួយដី ប៉ុន្តែមិនមានអ្នករងរបួសធ្ងន់ធ្ងរទេ៕