ប្រភពចំនួន៥ ដែលដឹងពីបញ្ហានេះ បានប្រាប់សារព័ត៌មានរ៉យទ័រថា ទីក្រុងវ៉ាស៊ីនតោន កំពុងបង្កើនសម្ពាធលើទីក្រុងបេរូត ឲ្យចេញសេចក្តីសម្រេចជាផ្លូវការរបស់គណៈរដ្ឋមន្ត្រីជាបន្ទាន់ ដោយប្តេជ្ញាដកអាវុធក្រុមហេសបូឡា មុនពេលកិច្ចចរចា អាចបន្តឡើងវិញលើការបញ្ឈប់ប្រតិបត្តិការយោធារបស់អ៊ីស្រាអែល នៅក្នុងប្រទេសលីបង់។

ប្រសិនបើគ្មានការប្តេជ្ញាចិត្តជាសាធារណៈពីរដ្ឋមន្ត្រីលីបង់ទេ សហរដ្ឋអាមេរិក នឹងលែងបញ្ជូនបេសកជនអាមេរិក លោក Thomas Barrack ទៅកាន់ទីក្រុងបេរូត ដើម្បីចរចាជាមួយមន្ត្រីលីបង់ ឬដាក់សម្ពាធលើអ៊ីស្រាអែល ឲ្យបញ្ឈប់ការវាយប្រហារតាមអាកាស ឬដកកងទ័ពរបស់ខ្លួនចេញពីភាគខាងត្បូងលីបង់។ នេះបើយោងតាមប្រភពដែលរួមមានមន្ត្រីលីបង់ពីររូប អ្នកការទូតរូបនាក់ និងប្រភពលីបង់ដែលដឹងពីបញ្ហានេះ។

ក្រសួងការបរទេសសហរដ្ឋអាមេរិក មិនបានឆ្លើយតបភ្លាមៗ ចំពោះសំណើសុំការអត្ថាធិប្បាយទេ។

ទីក្រុងវ៉ាស៊ីនតោន និងទីក្រុងបេរូត បានពិភាក្សាគ្នាអស់រយៈពេលជិត ៦សប្តាហ៍ហើយ លើផែនទីបង្ហាញផ្លូវរបស់សហរដ្ឋអាមេរិក ដើម្បីដកអាវុធពេញលេញពីក្រុមសកម្មប្រយុទ្ធហេសបូឡានៅលីបង់ ជាថ្នូរនឹងការឲ្យអ៊ីស្រាអែលបញ្ចប់ការវាយប្រហាររបស់ខ្លួន និងដកទ័ពចេញពីចំណុចចំនួន ៥ នៅភាគខាងត្បូងប្រទេសលីបង់។

សំណើដើម រួមមានលក្ខខណ្ឌដែលរដ្ឋាភិបាលនៃប្រទេសលីបង់ អនុម័តសេចក្តីសម្រេចរបស់គណៈរដ្ឋមន្ត្រីដោយសន្យាដកហូតអាវុធពីក្រុមហេសបូឡា។ ក្រុមហេសបូឡា បានបដិសេធជាសាធារណៈ ក្នុងការប្រគល់ឃ្លាំងអាវុធរបស់ខ្លួនទាំងស្រុង ប៉ុន្តែក្រុមនេះ បានថ្លឹងថ្លែងអំពីការកាត់បន្ថយចំនួនអាវុធ ជាសម្ងាត់។