ក្រសួងការពារជាតិឥណ្ឌូណេស៊ី បាននិយាយកាលពីថ្ងៃអង្គារទី២៩ ខែកក្កដាថា ប្រទេសឥណ្ឌូនេស៊ី បានចុះហត្ថលេខាលើកិច្ចសន្យាទិញយន្តហោះចម្បាំង KAAN ចំនួន៤៨គ្រឿងពីប្រទេសទួរគី ជាការចុះហត្ថលេខាលើការទិញចុងក្រោយដោយប្រទេសនៅអាស៊ីអាគ្នេយ៍មួយនេះក្នុងគោលបំណងធ្វើទំនើបកម្មយុទ្ធោបករណ៍ដែលមានអាយុកាលចំណាស់របស់ខ្លួន។

ដើម្បីពង្រឹងកម្លាំងទ័ពអាកាស ទីក្រុងហ្សាការតា ក៏បានបញ្ជាទិញយន្តហោះ Rafale របស់ប្រទេសបារាំងចំនួន៤២គ្រឿងមានតម្លៃ៨,១ពាន់លានដុល្លារក្នុងឆ្នាំ២០២២។ ប្រទេសនេះក៏កំពុងពិចារណាបញ្ជាទិញយន្តហោះចម្បាំង J-10 របស់ប្រទេសចិន និងបន្តការពិភាក្សាទិញយន្តហោះ F-15EX ផលិតដោយសហរដ្ឋអាមេរិកផងដែរ។

អ្នកនាំពាក្យក្រសួងការពារជាតិ បាននិយាយនៅក្នុងសេចក្តីថ្លែងការណ៍ថា ប្រទេសឥណ្ឌូនេស៊ី និងទួរគី បានចុះហត្ថលេខាលើកិច្ចសន្យាអនុវត្តកាលពីថ្ងៃសៅរ៍សប្តាហ៍មុននៅខាងក្រៅពិព័រណ៍ឧស្សាហកម្មការពារជាតិអន្តរជាតិ នៅទីក្រុងអ៊ីស្តង់ប៊ុល ប្រទេសទួរគី។