​វាយ​កូន​បាល់​៖ ​កីឡាករ​វាយ​កូន​បាល់​លេខ ១ ពិភពលោក Novak Djokovic បាន​ចេញមក​ធ្វើការ​ហ្វឹកហាត់​ជា​លើកដំបូង​ជាមួយគ្រូបង្វឹក Goran Ivanisevic នៅ​ទីក្រុង Melbourne ថ្ងៃ​អង្គារ​ម្សិលមិញ​ បន្ទាប់ពី​រឿងក្តី​ពាក់ព័ន្ធ​នឹង​ទិដ្ឋាការ​ចូល​ប្រទេសអូស្ត្រាលី​ត្រូវបាន​ជ្រះស្រឡះ​កាលពី​ថ្ងៃ​ចន្ទ​។

​​យ៉ាងណាក្តី​គេ​មិនទាន់​ដឹងថា ​កីឡាករ​វ័យ ៣៤ឆ្នាំ​រូបនេះ​អាច​ចូលរួម​ការប្រកួត Grand Slam, Australian Open បាន​រឺក៏​អត់​នៅឡើយ ដោយ​កំពុង​រង់ចាំ​ការសំរេច​របស់​រដ្ឋមន្ត្រី​អន្តោរ​ប្រវេសន៍​អូស្ត្រាលី​លោក Alex Hawke​។ ​ទោះបីជា​អ្នកគាំទ្រ Djokovic បាននាំគ្នា​អបអរសាទរ​ក្រោយ​តុលាការ​ទីក្រុង Melbourne ប្រកាស​ដោះលែង​ឱ្យមាន​សេរីភាព​ក៏ដោយ ក៏​អ្នកគាំទ្រ​អូស្ត្រាលី​ដែល​ធ្លាប់​ស្ថិតក្នុង​ស្ថានភាព​បិទ​ខ្ទប់​ជាច្រើន​ខែ​នោះ មិន​ពេញចិត្ត​ចំពោះ​ការសំរេចចិត្ត​របស់​តុលាការ​ដែរ ដែល​អនុញ្ញាតឱ្យ Djokovic ដែល​មិនមាន​វ៉ាក់សាំង​គ្រប់គ្រាន់​ចូល​ប្រទេស​។ ​​ជាមួយគ្នា​នោះដែរ កីឡាករ​ដែល​ចូលរួម​ព្រឹត្តិការណ៍ Grand Slam, Australian Open មួយចំនួន​ក៏​មិន​សប្បាយចិត្ត​ដូចគ្នា​ដែលមាន​ករណី​លើកលែង​ដូចជា Djokovic នេះ​។

​​Grand Slam, Australian Open បានបញ្ជាក់​ថា ​ពី​លក្ខខណ្ឌ​ចូលរួម​ប្រកួត​ដោយ​កីឡាករ-កីឡាការិនី ​និង​មនុស្ស​ពាក់ព័ន្ធ​ទាំងអស់​ត្រូវមាន​វ៉ាក់សាំង​គ្រប់​ចំនួន​។ ​​ផ្ទុយទៅវិញ​ទិដ្ឋាការ​របស់ Djokovic ដែល​តម្រូវឱ្យ​អម​ជាមួយ​បទដ្ឋាន​សុខាភិបាល​ស្តីពី​ការចាក់​វ៉ាក់សាំង​នោះ កីឡាករ​ស៊ែ​ប​រូប​នេះ​មិនមាន​ឯកសារ​ត្រឹមត្រូវ​ឡើយ​។ ​Grand Slam, Australian Open នឹង​ចាប់ផ្តើម​នៅ​ថ្ងៃទី​១៧ ខែមករា​ដើម​សប្តាហ៍ក្រោយនេះ​ហើយ ​ខណៈ Novak Djokovic កំពុង​សំឡឹង​ស្វែងរក​ជើងឯក Grand Slam មួយទៀត​ដើម្បី​កាន់​កំណត់ត្រា​អ្នកឈ្នះ Grand Slam ច្រើន​ជាង​គេ ដែល​បច្ចុប្បន្ន​នេះ​កីឡា​ករ​ ៣​រូប​កំពុង​មាន​ពាន Grand Slam ក្នុង​ដៃ ២០​លើក​ដូចគ្នា​រួមមាន Novak Djokovic, Roger Federer និង Rafael Nadal៕

​​អត្ថបទ​៖​នាង សុភា​វុ​ធ