ចក្រភពអង់គ្លេសនៅថ្ងៃពុធនេះ បានច្រានចោលការរិះគន់ដែលថា ខ្លួនផ្តល់រង្វាន់ដល់ក្រុមសកម្មប្រយុទ្ធហាម៉ាស ដោយដាក់ចេញនូវផែនការទទួលស្គាល់រដ្ឋប៉ាឡេស្ទីន ប្រសិនបើអ៊ីស្រាអែល មិនចាត់វិធានការកែលម្អស្ថានការណ៍ នៅតំបន់ហ្កាហ្សា និងនាំមកនូវសន្តិភាពទេ។

ទិដ្ឋភាននៃកុមារមានទឹកមុខស្លេកស្លាំងនៅតំបន់ហ្កាហ្សា បានធ្វើឲ្យពិភពលោកភ្ញាក់ផ្អើល ក្នុងរយៈពេលប៉ុន្មានថ្ងៃថ្មីៗនេះ ហើយកាលពីថ្ងៃអង្គារ អ្នកឃ្លាំមើលភាពអត់ឃ្លាន បានព្រមានថា ស្ថានភាពនៃគ្រោះទុរ្ភិក្សដ៏អាក្រក់បំផុត កំពុងលាតត្រដាងនៅទីនោះ ហើយចាំបាច់ត្រូវចាត់វិធានការជាបន្ទាន់ ដើម្បីជៀសវាងការស្លាប់កាន់តែច្រើន។

ឱសានវាទរបស់លោកនាយករដ្ឋមន្ត្រី Keir Starmer ដែលកំណត់កាលកំណត់នៅខែកញ្ញា សម្រាប់អ៊ីស្រាអែល បានជំរុញឲ្យមានការស្តីបន្ទោសភ្លាមៗពីសមភាគីរបស់លោក នៅទីក្រុងហ្ស៊េរុយសាឡឹម ដែលបាននិយាយថា ខ្លួនបានផ្តល់រង្វាន់ដល់ក្រុមហាម៉ាស និងដាក់ទណ្ឌកម្មជនរងគ្រោះនៃការវាយប្រហារឆ្លងព្រំដែនឆ្នាំ ២០២៣ របស់ពួកគេ។

ប្រធានាធិបតីអាមេរិក លោក ដូណាល់ ត្រាំ បាននិយាយថា លោកមិនគិតថា ក្រុមហាម៉ាស «គួរតែត្រូវបានផ្តល់រង្វាន់» ជាមួយនឹងការទទួលស្គាល់ឯករាជ្យភាពរបស់ប៉ាឡេស្ទីននោះទេ។